Pune Crime News : दिवसा खासगी बँकेत नोकरी, रात्री करायचा भयंकर खेळ; पुण्यातील तरुणासह ३९ जण अडकले

अक्षय बडवे, पुणे

विद्येचं माहेर घर असणाऱ्या पुण्यात चोरांचा सुळसुळाट वाढला आहे. असे असलं तरी या चोरांचा चोरी करण्याचा दर्जा बदलला आहे असं म्हणावं लागेल. कारण पुण्यातील एक तरुण चक्क दिवसभर खासगी बँकेत काम करत होता आणि रात्री मटका रॅकेट चालवत होता. मोबाईलवर ऑनलाइन पद्धतीने मटका जुगार चालवीत असलेल्या या तरुणाला आता पोलिसांनी बेड्या ठोकल्या आहेत. राहुल दिलीपसिंग परदेशी असं या आरोपीचं नाव आहे.

मिळालेल्या माहितीनुसार, राहुल दिलीपसिंग परदेशी हा पुण्यातील एका खासगी बँकेत कार्यरत होता. राहुल हा दिवस बँकेत काम करून रात्री पुण्यातील घोरपडी पेठ भागात असलेल्या जलतरण तलावाच्या जवळ उभा राहून मोबाईलवर पैसे स्वीकारून ऑनलाईन मटका जुगार चालवीत असल्याची माहिती पोलिसांना मिळाली होती.

पोलिसांना मिळालेल्या माहितीनुसार गुरुवारी रात्रीच्या सुमारास सापळा लावला आणि त्याला ताब्यात घेतलं. रात्रीच्या सुमारास राहुल मोबाईलवर ऑनलाईन पैसे स्वीकारून मटक्याच्या जुगाराचे आकड्याचे बुकिंग घेताना पोलिसांच्या तावडीत सापडला. तसेच 39 मोबाईल क्रमांक धारक हे ऑनलाईन मटका जुगार खेळताना आढळले.

या ३९ जणांवर देखील पोलिसांनी गुन्हा दाखल केला आहे. पोलिसांनी हा मोबाईल, रोख रक्कम आणि इतर साहित्य जप्त केले आहे. दरम्यान, बँकेमध्ये नोकरी करणारा तरुण ऑनलाईन मटका जुगार चालवत असल्यामुळे खळबळ उडाली आहे. या आरोपींना काय शिक्षा होणार हे पाहणं महत्त्वाचं ठरणार आहे.