Crime News: बलात्कार केला, प्रायव्हेट पार्टमध्ये लाल मिर्ची टाकली; पत्नी थेट पोलीस स्टेशनमध्ये पोहोचली

लखनऊमधील गुडम्बा पोलीस ठाण्याच्या परिसरातून एक अत्यंत धक्कादायक आणि मन सुन्न करणारी घटना समोर आलीये. एका विवाहित महिलेनं आपल्या पतीवर घरगुती हिंसा, हुंड्यासाठी छळ, मारहाण तसंच अमानुष अत्याचार केल्याचा गंभीर आरोप केला आहे. तिने केलेल्या आरोपांनुसार, पतीने तिच्यावर बलात्कार आणि प्रायव्हेट पार्टमध्ये लाल मिर्ची टाकली असल्याचा आरोप केलाय. या प्रकरणाची गंभीरता लक्षात घेऊन पोलिसांनी गुन्हा दाखल करून तपास सुरू केला आहे.

पीडित महिला सीतापूर जिल्ह्यातील मिश्रिख भागातील असून तिचं लग्न ३० ऑक्टोबर २०१० रोजी झालं होतं. लग्नानंतर काही दिवस सगळं ठीक होतं. मात्र काही दिवसांनी पण लवकरच तिच्या आयुष्यात त्रासाची सुरुवात झाली.

पतीला दारूचं व्यसन

पतीला दारूचं व्यसन असल्याचं तिला समजलं. यानंतर तिचा हुंड्यासाठी सतत छळ सुरू झाला. पती आणि सासरच्या मंडळींकडून १० लाख रुपयांची मागणी केली जात होती. पीडितेने सांगितलं की, वडिलांकडून २ लाख रुपये दिले तरीही तिचा छळ थांबला नाही.

मुलांसह सुनेला काढलं घराबाहेर

यानंतर परिस्थिती अधिकच वाईट झाली. पती, सासू, सासरे आणि दीर यांनी मिळून तिचे दागिने काढून घेतले आणि तिला दोन मुलांसह घराबाहेर काढलं. मात्र इतका त्रास होऊनही तिने हार मानली नाही. त्या महिलेने लखनऊमध्ये भाड्याने खोली घेतली आणि अर्बन कंपनीमध्ये ब्यूटीशियन म्हणून काम करत आपल्या मुलांचा सांभाळ सुरू केला.

पीडितेच्या म्हणण्यानुसार, जून २०२४ मध्ये पतीने माफी मागून पुन्हा एकत्र राहण्याचा बहाणा केला. पण त्यामागे वेगळाच डाव होता. तो तिला फसवून नशेच्या गोळ्या देत होता. १ ऑक्टोबर २०२४ रोजी घडलेली घटना तर अत्यंत क्रूर होती. पतीने जबरदस्तीने शारीरिक संबंध ठेवण्याचा प्रयत्न केला. ती विरोध करताच त्याने तिच्यावर अमानुष अत्याचार केला आणि तिच्या प्रायव्हेट पार्टमध्ये लाल मिरची टाकल्याचा आरोप आहे.

जीवे मारण्याचीही दिली धमकी

या घटनेनंतर आरोपी पतीने तिला जीवे मारण्याची धमकी दिली आणि फरार झाला. पीडितेने अनेक वेळा पोलिसांकडे धाव घेतली पण सुरुवातीला तिला योग्य प्रतिसाद मिळाला नाही. मात्र हा प्रकार समोर आल्यानंतर आणि वरिष्ठ अधिकाऱ्यांच्या लक्षात आल्यानंतर आता पोलिसांनी या प्रकरणात कारवाई सुरू केली आहे.