पराग ढोबळे, साम प्रतिनिधी
नागपुरात घडलेल्या हिट अँड रन प्रकरणात मोठी अपडेटसमोर आलीय. २२ कोटी रुपयांच्या संपत्तीसाठी सूनेनेच सासऱ्याच्या हत्येची सुपारी दिल्याची धक्कादायक बाब पोलीस तपासात समोर आलीय. याप्रकरणातील आरोपी सूनेसह ३ जणांना अटक करण्यात आलीय. विशेष म्हणजे हत्येचा कट रचणारी सून ही गडचिरोली जिल्ह्यात सरकारी नोकरीवर कार्यरत आहे.
नागपूरच्या बालाजी नगर परिसरात २२ मे रोजी हिट अँड रनची घटना घडली होती. यात पुरुषोत्तम पुट्टेवार नावाचे व्यक्तीचा मृत्यू झाला होता. पुरुषोत्तम पुट्टेवार यांना एका कारने चिरडलं होतं. नागपूर पोलिसांनी या हिट अँड रन प्रकरणाचा तपास सुरू केला. या तपासात एक धक्कादायक बाब समोर आली. हा रस्ते अपघात नसून सुपारी देऊन हा घातपात घडवण्यात आल्याचं वास्तव पोलिसांच्या तपासात समोर आलं होतं.
याप्रकरणी पोलिसांनी पुट्टेवार यांच्या सूनेला अर्चना पुट्टेवार हिला अटक केलीय. पोलिसांनी दिलेल्या माहितीनुसार, पुट्टेवार यांच्या ३०० कोटी रुपयांच्या संपत्तीवर सूनेचा डोळा होता. ही संपत्ती हडपण्यासाठी अर्चना हिने पतीच्या कार चालकाला हाताशी धरलं. त्याला सासरे पुरुषोत्तम पुट्टेवार यांच्या हत्येची सुपारी दिली. पुरुषोत्तम यांच्या हत्येसाठी अर्चनाने चालकाला १ कोटी रुपयांची सुपारी दिली होती. अर्चनाने हत्येपूर्वी चालकाला १७ लाख रुपये दिले होते.
दरम्यान अर्चना पुट्टेवारी हिने तिच्या सासऱ्यांच्या हत्येचा तीनवेळा प्रयत्न केला. पहिला प्रयत्न हा ८ मे रोजी झाला होता. त्यानंतर दुसरा प्रयत्न १६ मे रोजी झाला. तिसरा प्रयत्न हा २२ मे रोजी झाला या तिसऱ्या प्रयत्नात पुरुषोत्तम पुट्टेवार यांना कारने पाठीमागून धडक दिली. धडक लागल्यानंतर पुरुषोत्तम हे कारखाली आले त्यामुळे त्यांचा मृत्यू झाला होता.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.