Mumbai Crime: मुंबईत ड्रग्ज टोळीचा पर्दाफाश,पोलिसांनी उघडकीस आणली १३ कोटींची तस्करी

मयूर राणे, साम टीव्ही

RCF पोलिस ठाण्याच्या हद्दीत मोठ्या प्रमाणावर अमलीपदार्थ विक्री प्रकरणाचा पर्दाफाश करण्यात आला आहे. पोलिसांनी तब्बल १३ कोटी ३७ लाख ६० हजार रुपये किमतीचे सुमारे ६ किलो ६८८ ग्रॅम मेफेड्रोन MD ड्रग्स जप्त करत पाच आरोपींना अटक केली आहे.कारवाई दरम्यान रेहान शेख नावाच्या तरुणास MD ड्रग्सची विक्री करताना रंगेहाथ पकडण्यात आले. त्याच्याकडून सुमारे साडे चार लाख रुपये किमतीचे MD जप्त करण्यात आले. पुढील चौकशीत त्याच्याकडून मिळालेल्या माहितीवरून पोलिसांनी आणखी चार ड्रग विक्रेत्यांचा शोध घेऊन त्यांनाही अटक केली.

या पाचही आरोपींकडून मिळून तब्बल १३ कोटींपेक्षा अधिक किमतीचा MD ड्रग्स साठा जप्त करण्यात आला आहे. पोलिसांच्या प्राथमिक तपासानुसार ही एक मोठी ड्रग टोळी असण्याचा संशय असून, आणखी आरोपींचा शोध सुरू आहे.

दरम्यान कोट्यावधीचे हे ड्रग्स नेमके आले कोठून? असा सवाल देखील उपस्थित केला जात आहे

या कारवाईमुळे मुंबईतील अमलीपदार्थांच्या गैरव्यवहारावर मोठा आळा बसण्याची शक्यता व्यक्त करण्यात येत आहे. पुढील तपास सुरू आहे.

अहिल्यानगरमध्ये ही पोलिसांची ड्रग्स प्रकरणाची मोठी कारवाई

अहिल्यानगर जिल्ह्यातील श्रीरामपूर तालुक्यात पोलिसानी मोठी 15 मे रोजी मोठी कारवाई केली होती. या कारवाईत तब्बल 13 कोटी 75 लाख रुपये किमतीचा ड्रग्सचा साठा जप्त केला आहे. या कारवाईमुळे नगर जिल्ह्यात मोठी खळबळ उडाली आहे.

राज्यात छुप्या पद्धतीने अमली पदार्थ तसेच ड्रग्सची तस्करी होत असल्याचे वारंवार समोर येत आहे. ही कारवाई श्रीरामपुर पोलिसांनी खंडाळा-दिघी रस्त्यावर रात्रीच्या सुमारास कारवाई केली होती. यामध्ये देखील मोठ्या प्रमाणात ड्रग्सचा साठा आढळून आला होता.