Teacher Assault : शिक्षकाची क्रूर शिक्षा! आजीला फोन केल्यामुळे विद्यार्थ्याला मारहाण, VIDEO व्हायरल

कर्नाटकातील चित्रदुर्ग जिल्ह्यातून एक धक्कादायक घटना समोर आली आहे. एका शिक्षकाने विद्यार्थ्याला बेदम मारहाण केली. या घटनेचा व्हिडिओ सोशल मीडियावर व्हायरल झाला आहे. याप्रकरणी पोलिसांनी आरोपी शिक्षकाला अटक केली आहे. या घटनेनंतर विद्यार्थ्यांच्या सुरक्षितेवर प्रश्नचिन्ह उपस्थित झाले आहे.

मिळालेल्या माहितीनुसार, सदर घटना ही कर्नाटकातील चित्रदुर्ग जिल्ह्यात नायकनहट्टी परिसरातील श्रीगुरु थिप्पेरुद्रास्वामी निवासी वेद विद्यालयातील आहे. ही घटना सुमारे आठ महिने जुनी असल्याचे सांगितले जात आहे, परंतु त्याचा एक व्हिडिओ नुकताच समोर आला आहे. व्हिडिओमध्ये शिक्षक वीरश हिरेमठ एका विद्यार्थ्याला वारंवार मारहाण करताना दिसत आहेत.

विद्यार्थ्याच्या पालकांनी म्हटले आहे की, विद्यार्थ्याने दुसऱ्याच्या मोबाईल फोनवरून त्याच्या आजीला फोन केला होता. ज्यामुळे शिक्षक संतापले आणि त्यांनी त्याला बेदम मारहाण केली. विद्यार्थ्याने वारंवार माफी मागितली परंतु शिक्षकाने दया दाखवली नाही. व्हिडिओ व्हायरल झाल्यानंतर, पोलिसांनी तपास सुरू केला आणि कलबुर्गी येथील आरोपी शिक्षक वीरश नन्ना हिरेमठ याला अटक केली.

चित्रदुर्गाचे पोलिस अधीक्षक रणजित कुमार यांनी सांगितले की, आरोपीला न्यायालयात हजर केले जाईल आणि पुढील तपास सुरू आहे. या घटनेनंतर, पीडित विद्यार्थ्याने शाळा सोडली आणि ट्रान्सफर सर्टिफिकेट मिळवल्यानंतर दुसऱ्या संस्थेत प्रवेश घेतला. अशा घटनांनंतर विद्यार्थ्यांच्या सुरक्षेतवर प्रश्न निर्माण झाला आहे.