Crime: प्रेमसंबंधाला विरोध, बापाने मुलीला संपवलं; आधी कीटकनाशक पाजलं नंतर...

कर्नाटकच्या कुलबुर्गी जिल्ह्यामध्ये मन हेलावून टाकणारी घटना घडली. एका व्यक्तीने आपल्या १८ वर्षांच्या मुलीची निर्घृण हत्या केली. दुसऱ्या जातीतील मुलावर प्रेम करते यामुळे संतप्त झालेल्या बापाने हे धक्कादायक कृत्य केले. मृत मुलीचे नाव कविता होते. ती नर्सिंगचे शिक्षण घेत होती. कविता मेलकुंडा गावामध्ये आपल्या कुटुंबीयांसोबत राहत होती.

पोलिसांनी दिलेल्या माहितीनुसार, कविताचे वडील शंकरने २८ ऑगस्ट रोजी तिची गळा दाबून हत्या केली. मुलीच्या हत्येनंतर शंकरने दावा केला होता की कविताने आत्महत्या केली. त्यानंतर त्याने गावातच तिचे अंत्यसंस्कार केले. यानंतर फरहताबाद पोलिस ठाण्याला प्रकरण दडपल्याबद्दल माहिती मिळाली. पोलिसांनी तात्काळ घटनास्थळी धाव घेत कारवाई करत आरोपीला अटक केली. तर शंकरच्या दोन नातेवाईकांना पोलिसांनी प्रकरण दाबल्याच्या आरोपाखाली ताब्यात घेण्यात आले आहे.

शंकरला ५ मुली आहेत. त्यामधील कविताचे गावातील एका तरुणासोबत प्रेमसंबंध होते. हा तरुण दुसऱ्या जातीचा आहे. कविता लिंगायत जातीतून होती. तर तिचा प्रियकर दुसऱ्या जातीतून होता. कविताच्या कुटुंबीयांचा या नात्याला विरोध होता. कविताच्या कुटुंबीयांना या प्रेमसंबंधाविषयची माहिती ३ महिन्यांपूर्वीच कळाली होती. शंकरला आपल्या मुलीचे प्रेमसंबंध मान्य नव्हते. त्यामुळे त्याने कविताला त्या मुलासोबत राहू नको असे सांगितले होते. पण कविताने वडिलांना नकार दिला होता.

त्यानंतर संतप्त झालेल्या शंकरने कविताच्या तोंडात कीटकनाशक टाकून तिची हत्या केली. त्यानंतर त्याने पोलिसांची दिशाभूल करण्यासाठी कविताने आत्महत्या केल्याचा दावा केला. त्यानंतर त्याने २५० गावकऱ्यांच्या उपस्थितीमध्ये आपल्या भावाच्या जमिनीवर कविताचे अंत्यसंत्कार केले. पोलिसांना घटनेची माहिती मिळताच त्यांनी घटनास्थळी धाव घेत पुरावे गोळ्या केले. फॉरेन्सिक टीमने देखील घटनास्थळी धाव घेत पुरावे गोळा करून घेतले. त्यानंतर पोलिसांनी शंकरची कसून चौकशी केली तर त्याने कविताची गळा दाबून हत्या केली असल्याचे कबुल केले. यानंतर पोलिसांनी आरोपीविरोधात गुन्हा दाखल करत त्याला अटक केली.