Shocking : नाशिक हादरलं! बळजबरीने प्रेमसंबंध ठेवण्यास प्रवृत्त, अल्पवयीन मुलीनं आयुष्याचा दोर कापला

नाशिकमध्ये घडलेल्या एका धक्कादायक घटनेने पुन्हा एकदा अल्पवयीन मुलींच्या सुरक्षेचा प्रश्न ऐरणीवर आला आहे. अंबड परिसरात राहणाऱ्या एका अल्पवयीन मुलीने महाविद्यालयीन स्तरावर सतत होणाऱ्या मानसिक त्रासाला कंटाळून आत्महत्या केल्याची खळबळजनक घटना उघडकीस आली आहे. बळजबरीने प्रेमसंबंध ठेवण्याचा दबाव, शिवीगाळ, सोशल मीडियावरून केलेली बदनामी आणि सततचा छळ या कारणांमुळे या अल्पवयीन मुलीने आत्महत्या केल्याचे प्राथमिक तपासात स्पष्ट झाले आहे.

मिळालेल्या माहितीनुसार, मृत मुलगी स्थानिक महाविद्यालयात शिक्षण घेत होती. त्याच महाविद्यालयात शिकणारे गणेश भांगरे, अक्षय वरठे आणि अतिश वैद्य या तिघांनी तिला प्रेमसंबंध ठेवण्यास भाग पाडण्याचा प्रयत्न केला. विशेषत: गणेश भांगरेसोबत जबरदस्ती प्रेमसंबंध ठेवण्याची मागणी केली जात होती. मात्र मुलीने ठाम नकार दिल्यामुळे संशयित अतिश वैद्यने तिचे इन्स्टाग्राम आयडी व पासवर्ड घेतले. त्यावर तिचा एका मुलासोबत गळ्यात हात टाकलेला फोटो पोस्ट करत ‘बॉयफ्रेंड आहे’ असा मजकूर लिहला. या पोस्टमुळे महाविद्यालयीन परिसरात तिची प्रतिमा मलिन झाली व बदनामी झाली.

याचदरम्यान गणेश भांगरे याने मुलीला वारंवार फोन करून शिवीगाळ केली आणि तिला धमकावले. सततच्या या मानसिक छळामुळे ती प्रचंड नैराश्यात गेली. अखेरीस तिने आपल्या घरातील बेडरूममध्ये सिलिंग फॅनला ओढणीच्या साहाय्याने गळफास घेऊन जीवन संपवले. घरच्यांनी तिला तातडीने जवळच्या रुग्णालयात नेले. मात्र डॉक्टरांनी तिला मृत घोषित केले.

या घटनेने संपूर्ण परिसरात संतापाचे वातावरण निर्माण झाले आहे. विशेषत: अल्पवयीन मुलींवर होणारा मानसिक छळ आणि सोशल मीडियाचा गैरवापर किती घातक ठरू शकतो याचे हे गंभीर उदाहरण मानले जात आहे. आत्महत्या करणाऱ्या मुलीच्या कुटुंबीयांवर दुःखाचा डोंगर कोसळला असून, त्यांनी दोषींवर कठोर कारवाईची मागणी केली आहे.

घटनेनंतर अंबड पोलिसांनी गणेश भांगरे, अक्षय वरठे आणि अतिश वैद्य या संशयितांविरुद्ध गुन्हा दाखल केला आहे. मात्र यातील अतिश वैद्य हा संशयित फरार असून पोलिस त्याचा शोध घेत आहेत. पोलिसांनी घटनास्थळी पंचनामा करून मृतदेह शवविच्छेदनासाठी पाठवला आहे. पुढील तपास सुरू असून, दोषींवर कठोर कारवाई केली जाईल असे पोलिसांनी स्पष्ट केले आहे.