Jalgaon Crime: ५ वर्ष दोघांचं सुरू होतं अफेअर, विवाहितेच्या नकरानंतर डोकं सटकलं; इंस्टाग्रामवरील प्रेमाचा भयानक अंत

अकुलखेडा गावात इंस्टाग्रामवर सुरू झालेल्या एका प्रेमप्रकरणाचा अंत दुहेरी हत्याकांडाने झाला. ३० वर्षीय विवाहितेची गोळ्या झाडून हत्या केल्यानंतर प्रियकराने स्वतःचेही जीवन संपवल्याची घटना जळगाव जिल्ह्यातील चोपडा तालुक्यात घडली. या धक्कादायक घटनेमुळे संपूर्ण जळगाव जिल्हा हादरला. ही घटना घडली होती शनिवारी.

हा अकुलखेडा येथील पाटील कुटुंबासाठी काळा दिवस ठरला. पाटील यांची मुलगी शाळेतून घरी परतली तेव्हा तिला तिची आई आणि एक तरुण रक्ताच्या थारोळ्यात पडलेले दिसले. त्यानंतर तिने शेजाऱ्यांना याची माहिती दिली. शेजाऱ्यांनी याची माहिती पोलिासांना दिली. पोलिसांनी केलेल्या तपास धक्कादायक बाब उघडकीस आली.

पोलीस तपासात समोर आलेल्या माहितीनुसार, शिरपूर येथील रहिवासी असलेल्या २६ वर्षीय तरुणाची एका विवाहितेबरोबर इंस्टाग्रामवर ओळख झाली. या दोघाच्या ओळखीचे रूपांतर प्रेमात झाले. या दोघाचे प्रेम प्रकरण पाच वर्षे सुरू होतं. विवाहितेला दोन मुले होती, तर तरुण देखील विवाहित होता. या नात्यामुळे त्याची पत्नी त्याला सोडून गेली होती.

परंतु काही दिवसापासून तरुण आणि विवाहितेच्या नात्यात मिठाचा खडा पडला होता. विवाहितेने तरुणाची बोलणे टाळण्यास सुरुवात केली होती. तो वारंवार संपर्क साधण्याचा प्रयत्न करत होता, मात्र विवाहिता त्याच्याशी बोलत नव्हती. याच रागातून त्याच्या डोक्यात सूडाची भावना निर्माण झाली. शनिवारी सकाळी तो आपली दुचाकी घेऊन थेट अकुलखेडा येथे विवाहितेच्या घरी पोहोचला.

तिथे पुन्हा वाद झाला आणि संतापाच्या भरात त्याने आपल्यासोबत आणलेल्या गावठी पिस्तूलमधून विवाहितेच्या डोक्यात गोळी झाडली. त्यानंतर त्याने त्याच पिस्तूलने स्वतःवरही गोळी झाडून घेतली. घटनेची माहिती मिळताच वरिष्ठ पोलीस अधिकाऱ्यांनी ताफ्यासह घटनास्थळी धाव घेतली. पोलिसांनी घटनास्थळावरून दुचाकी आणि गावठी पिस्तूल जप्त केले आहे. विवाहितेच्या पतीने दिलेल्या फिर्यादीवरून खुनाचा गुन्हा दाखल करण्यात आला आहे.