नवऱ्याकडून हुंड्याची मागणी, रागाच्या भरात 4 महिने गरोदर कमांडो बायकोच्या डोक्यात घातलं डंबल अन्...

राजधानी दिल्लीमधून एक धक्कादायक घटना समोर आली आहे. दिल्ली पोलिसांच्या विशेष कक्षात तैनात असलेल्या महिला कमांडो काजलची तिच्या पतीनेच हत्या केल्याचा आरोप आहे. काजल चार महिन्यांपासून गरोदर होती.

मिळालेल्या माहितीनुसार, काजलचे दोन वर्षांपूर्वी अंकुरसोबत लग्नाची गाठ बांधली होती. या दोघांचे लव्ह मॅरेज होते. सुरुवातीला त्यांचा संसार व्यवस्थित सुरू होता. काही दिवसांनी त्यांच्यामध्ये हुंड्यावरून वाद सुरू झाले. तिच्याकडून गाडी आणि पैशाची मागणी केली जात होती. तिचा मानसिक आणि शारीरिक छळही केला जात होता.

काजल 2022 मध्ये पोलीस दलात रुजू झाली होती. मेहनत आणि शिस्तीच्या जोरावर ती स्पेशल युनिटमध्ये तिची नियुक्ती झाली. 2023 मध्ये तिने संरक्षण मंत्रालयात लिपिक असलेल्या अंकुरसोबत लग्न केले. दोघेही उच्चशिक्षित आणि नोकरी करणारे होते. पण घरातील परिस्थिति हळूहळू बिघडू लागली. कुटुंबाने सांगितले की, काजलने आपल्या नवऱ्यापासून वेगळे राहण्याचा सांगितले. यावेळी तिच्या नवऱ्याने तिला मारहाण केली. गरोदर असून ती घरातील सर्व काम करत असायची.

लोखंडी डंबलने काजलवर हल्ला

पोलिसांनी दिलेल्या माहितीनुसार, 22 जानेवारी 2026 रोजी रात्री 10 वाजेच्या सुमारास अंकुरने काजलवर लोखंडी डंबलने हल्ला केला. डोक्याला गंभीर दुखापत झाल्याने तिला हॉस्पिटलमध्ये नेण्यात आली. मात्र उपचारादरम्यान तिचा मृत्यू झाला. सुरुवातीला हत्येचा प्रयत्न या कलमाअंतर्गत गुन्हा दाखल केला. यानंतर कलम अधिक वाढवून हत्या केल्याचे लावण्यात आले. पोलिसांनी नराधम नवऱ्याच्या मुसक्या आवळल्या आहे.

काजलचे वडील आणि भावाने सांगितले की ही एक फक्त एका महिलेची हत्या नसून आई आणि तिच्या मुलाची हत्या आहे. हरियाणाच्या सोनीपत जिल्ह्यातील गनौर या काजलच्या मूळ गावी संतापाची लाट पसरली आहे. संपूर्ण गावाला ज्या मुलीचा गर्व होता त्या मुलीचा मृतदेह तिरंग्यामध्ये लपेटून आला. शासकीय इतमामात तिच्यावर अंत्यसंस्कार करण्यात आले. यावेळी तिच्या कुटुंबाने टाहो फोडला. या घटनेमुळे पुन्हा एकदा हुंडा घेणाऱ्यांच्या प्रवृत्तीबद्दल कठोर पाऊले उचलावी अशी मागणी जोर धरत आहे.