गर्लफ्रेंड-बॉयफ्रेंडचा बंद खोलीत सापडला मृतदेह; 'त्या' दिवशी नेमकं काय घडलं?

ग्रेटर नोएडातील नॉलेज पार्क पोलीस ठाण्याच्या हद्दीत असलेल्या तुगलपूर भागात एका लिव्ह-इन कपलचे मृतदेह त्यांच्या भाड्याच्या खोलीत आढळल्याने खळबळ माजली आहे. गुड्डू पासवान उर्फ गोलू (30) आणि त्याची पार्टनर ज्योती असे मृतांची नावे आहेत. मिळालेल्या माहितीनुसार, गुड्डू आणि ज्योती गेल्या तीन वर्षांपासून तुगलपुरमध्ये भाड्याने राहत होते. रात्रीच्या सुमारास त्यांच्या खोलीतून दुर्गंधी येत असल्याची माहिती शेजाऱ्यांनी दिली. पोलिसांनी घटनास्थळी पोहोचून दरवाजा तोडला असता, आत गुड्डूचा मृतदेह छताला लटकलेल्या अवस्थेत आढळला, तर ज्योतीचा मृतदेह बेडवर पडलेला होता.

दोघेही मुळचे देवरिया येथील रहिवासी होते. ज्योती एका खासगी रुग्णालयात हाऊसकीपिंगचे काम करायची, तर गुड्डू बेरोजगार होता. मागील 20 दिवसांपासून ज्योती कामावर गेली नव्हती, ज्यामुळे घरात पैशांची कमतरता निर्माण झाली होती. गुड्डूच्या बेरोजगार असण्यावरून त्यांच्यात अनेकदा कडाक्याची भांडणे व्हायची, अशी माहिती शेजाऱ्यांनी दिली.

पोलिसांच्या प्राथमिक तपासानुसार, गुड्डूने प्रथम ज्योतीची हत्या केली असावी आणि त्यानंतर स्वतः गळफास लावून आत्महत्या केली असावी. मृतदेह दोन दिवसांपूर्वीचे असावेत असा अंदाज आहे, कारण घरातून दुर्गंधी सुटली होती. खोलीतून दुर्गंधी येत असल्याची माहिती मिळाल्यावर पोलिसांनी दरवाजा तोडून प्रवेश केला. घटनास्थळी फॉरेन्सिक टीमला पाचारण करण्यात आले असून पुढील तपास सुरू आहे. अशी माहिती पोलिसांनी दिली.