Crime news: घरचे बाहेर गेले असताना घरात घुसला अन्..; शेजारी राहणाऱ्या तरूणाकडून अल्पवयीन मुलीवर अत्याचार, राज्यात खळबळ

राजस्थानातील जैसलमेर शहरात घडलेली एक धक्कादायक घटना समोर आली आहे. अल्पवयीन मुलीवर लैंगिक अत्याचार झाल्याने परिसरात खळबळ उडाली आहे. पीडितेच्या कुटुंबीयांनी तातडीने महिला पोलिस ठाण्यात तक्रार दाखल केली असून, पोलिसांनी गुन्हा नोंदवून तपास सुरू केला आहे.

घरी एकटी असताना घटना

मिळालेल्या माहितीनुसार, पीडित मुलगी अंदाजे १२ ते १३ वर्षांची असून तिचे आई-वडील कामासाठी बाहेर गेले होते. यावेळी संधी साधून शेजारी राहणाऱ्या एका तरूणाने तिच्यावर बलात्कार केला. दरम्यान हा गुन्हा केल्यानंतर आरोपी फरार झाल्याची माहिती आहे.

दररोजचं काम आवरून संध्याकाळी आई-वडील घरी परतल्यावर मुलगी घरात दिसली नाही. यावेळी पालकांनी घाबरून आसपास शोध घेतला. बराच शोध घेतल्यानंतर ती मुलगी जवळच्या एका ठिकाणी घाबरलेल्या अवस्थेत सापडली. तिची अवस्था पाहून कुटुंबीयांना धक्का बसला आणि तिची चौकशी केली.

आईला सांगितली संपूर्ण घडलेली घटना

दरम्यान घडलेली संपूर्ण घटना मुलीने आईला सांगितली. शेजारी राहणाऱ्या युवकाने तिच्यावर जबरदस्ती केल्याचं तिने सांगितलं. हे ऐकताच कुटुंबीयांनी तिला तातडीने पोलीस ठाण्यात नेलं आणि आरोपीविरुद्ध तक्रार नोंदवली.

पोलिसांचा तपास सुरू

मुलीच्या तक्रारीच्या आधारे पोलिसांनी गुन्हा दाखल केला आहे. तर आता तक्रारीवरून आरोपीचा शोध सुरू असून लवकरच त्याला अटक केली जाईल असं पोलिसांनी सांगितलं आहे. दरम्यान या घटनेवरून मुलींच्या सुरक्षेचा प्रश्न पुन्हा एकदा ऐरणीवर आला आहे. या दुर्देवी घटनेनंतर पीडितेची वैद्यकीय तपासणी करण्यात आली असून, तिच्यावर बलात्कार झाल्याची माहिती मिळाली आहे.