१०,२०,५० च्या नोटा ATM मध्ये का नाहीत? देशात चलनाचा तुटवडाय? वाचा नेमकं सत्य

ATM Cash Withdrawal: यूपीआय वापरामुळे एटीएमचा वापर थोड्या प्रमाणात कमी झाला आहे. आपण एटीएममध्ये पैसे काढतो, त्यावेळी ५००, २०० आणि १०० रूपयांच्याच नोटा येतात. १०, २०, ५० च्या नोटा चलनात असून एटीएममधून का येत नाहीत? देशात चलनाचा तुटवडा तर नाही ना? असे प्रश्न मनात येत असतील. पण आता याचं उत्तर सरकारकडून देण्यात आले आहे. देशात चलनात असलेल्या १०, २० आणि ५० रुपयांच्या नोटांची कमतरता नाही, अशी माहिती केंद्रीय अर्थ राज्यमंत्री पंकज चौधरी यांनी राज्यसभेत एका प्रश्नाचे उत्तर देताना दिली.

एटीएममधून पैसे काढताना नेहमीच ५००, २०० आणि १०० रूपयांच्याच नोटा येतात. पण १०, २० किंवा ५० रुपयांच्या नोटा का सोडल्या जात नाहीत? असा प्रश्न अनेकदा पडतो. राज्यसभेत यावरून देशात नोटांचा तुटवडा आहे का? असा सवाल उपस्थित केा होता. या प्रश्नावर उत्तर देताना केंद्रीय अर्थ राज्यमंत्री पंकज चौधरी यांनी चलनात या नोटांची कोणतीही कमतरता नसल्याचे सांगितले.

लहान मूल्याच्या नोटा वितरकांद्वारे कमी मूल्याच्या नोटा वितरित करण्यासाठी एक पायलट प्रोजेक्ट सुरू करण्यात आला असल्याची माहिती चौधरी यांनी मंगळवारी सभागृहाला दिली. कमी मूल्याच्या चलनाची मागणी नोटा आणि नाण्यांच्या मिश्रणाद्वारे पूर्ण केली जाते. त्याशिवाय डिजिटल पेमेंट हा आता व्यवहारांचा एक महत्त्वाचा भाग झालाय.

आतापर्यंत चलनात किती पुरवठा झाला?

२६ फेब्रुवारीपर्यंत मध्यवर्ती बँकेने १० रुपयांच्या ४३९.४० कोटी नोटा, २० रुपयांच्या १९३.७० कोटी नोटा आणि ५० रुपयांच्या १३०.३० कोटी नोटा पुरवल्या आहेत. तर गेल्या आर्थिक वर्षात (२०२५) १० रुपयांच्या १८० कोटी नोटा, २० रुपयांच्या १५० कोटी नोटा आणि ५० रुपयांच्या ३०० कोटी नोटा पुरवल्या होत्या, अशी माहिती सरकारने दिली आहे.