Tractor Price: शेतकऱ्यांसाठी आनंदाची बातमी! ट्रॅक्टरच्या किंमती ६० हजारांनी कमी होणार, घटस्थापनेपासून नवे दर

जीएसटीमध्ये कपात केल्यामुळे सर्वसामान्यांना दिलासा मिळाला आहे. जीएसटीमध्ये कपात झाल्यानंतर आता शेतकऱ्यांसाठी आनंदाची बातमी समोर आली आहे. जीएसटीमध्ये कपातीचा थेट परिणाम कृषी यंत्रणाच्या किंमतीवर होणार आहे. ट्रॅक्टरच्या किंमतीत जवळपास ६० हजारांपर्यंत कपात होणार आहे. याचसोबत इतर कृषी यंत्रणांच्याही किंमती कमी होणार आहे.

जीएसटीमध्ये कपात झाल्यानंतर ट्रॅक्टरच्या किंमती ६२ हजारांनी कमी होणार आहेत. इतर कृषी यंत्रणाच्या किंमती पावणेदोन लाख रुपयांपर्यंत कमी होणार असल्याचे सांगितले जात आहे. त्यामुळे शेतीसाठी उपयोगी सर्व यंत्रणांच्या किंमती कमी होणार आहेत.

येत्या २२ सप्टेंबरपासून नवीन जीएसटी कर लागू करणार आहेत. दरम्यान, कृषी यंत्रणांवरील किंमती कमी होणार आहेत परंतु कितीने याबाबत कोणतीही माहिती समोर आलेली नाही. २२ सप्टेंबर रोजी याबाबतच सर्व चित्र स्पष्ट होईल.सध्या यंत्रे व अवजारे उत्पादक माल पुरवठादारांकडील किंमत सूचीची वाट पाहत आहेत, अवजारे तयार करण्यासाठी सूटे भाग लागतात. त्यावर आता पुरवठादार किती सूट देतात, हे सुधारित कोटेशनमधून लक्षात येणार आहे. यामुळे कोटेशनमधील आकडे आणि निर्मितीचा खर्च या सर्व गोष्टी लक्षात घेऊन किंमत किती कमी करायची, याचा निर्णय उत्पादक घेणार आहेत.

अॅग्रीकल्चर मिशनरी मॅन्युफॅक्चरिंग असोसिएशन ऑफ इंडियाचे अध्यक्ष भरत पाटील यांनी याबाबत माहिती दिली. कृषी यंत्रे आणि अवजारांवरील जीएसटी आता ५ टक्के करण्यात आला आहे.यामध्ये ७ टक्के सवलत मिळाली आहे. मात्र, सुट्या भागांवर जीएसटी सूट दिलेली की नाही याबाबत कोणतीही माहिती समोर आलेली नाही. यामुळेच उत्पादक उद्योगा संभ्रमात आहे. त्यामुळे किंमती किती कमी होणार याबाबत संभ्रम आहे.