NPS update : मोदी सरकारचा मोठा निर्णय; NPS मध्ये गुंतवणुकीचे २ नवे पर्याय, नेमका काय होणार फायदा?

NPS Latest Update : केंद्र सरकारने राष्ट्रीय पेन्शन प्रणाली (NPS) अंतर्गत येणाऱ्या केंद्रीय स्वायत्त संस्थांच्या (CABs) कर्मचाऱ्यांना मोठा दिलासा दिला आहे. आता या कर्मचाऱ्यांना त्यांच्या पेन्शन गुंतवणुकीसाठी दोन नवीन आणि फायदेशीर फंड निवडण्याची मुभा देण्यात आली आहे. वित्त मंत्रालयाने घेतलेल्या या निर्णयामुळे कर्मचाऱ्यांना सेवानिवृत्तीचे (Retirement) नियोजन अधिक चांगल्या प्रकारे करता येणार आहे. यामुळे गुंतवणुकीत सुरक्षितता आणि वाढ दोन्हीचा समतोल राहतो. हे नवीन २ पर्याय नेमके काय आहेत आणि त्याचा कर्मचाऱ्यांना कसा फायदा होईल, ते जाणून घेऊया...

LC-75 (अ‍ॅग्रेसिव्ह फंड) आणि BLC (बॅलन्स्ड फंड) हे दोन नवीन आणि फायदेशीर फंड निवडण्याचा पर्याय दिला. LC-75 मध्ये ७५% पर्यंत इक्विटी (शेअर बाजार) गुंतवणूक करता येते, जी दीर्घकाळात जास्त परतावा देऊ शकते. तर BLC मध्ये (बॅलन्स्ड फंड) ५०% इक्विटी मर्यादा असते आणि ४५ वर्षांनंतर ती हळूहळू कमी होते. ही माहिती अर्थ मंत्रालयाच्या खर्च विभागाने दिली आहे. खर्च विभागाने सांगितले की, वित्तीय सेवा विभागाची १३ नोव्हेंबर २०२५ रोजीची अधिसूचना NPS अंतर्गत येणाऱ्या केंद्रीय स्वायत्त संस्थांच्या कर्मचाऱ्यांसाठी लागू करण्यात आली आहे.

अर्थ मंत्रालयाने काय सांगितले?

अर्थ मंत्रालयाने सांगितले की, या नवीन गुंतवणूक पर्यायांमुळे स्वायत्त संस्थांमधील कर्मचाऱ्यांना मोठा फायदा होईल. आता कर्मचारी आपल्या आवडीनुसार भविष्यातील आर्थिक गरजांचा विचार करून आणि स्वतःची जोखीम घेण्याची क्षमता पाहून पेन्शनच्या पैशांची गुंतवणूक कुठे करायची, हे ठरवू शकतील. यामुळे कर्मचाऱ्यांना गुंतवणुकीचे अधिक स्वातंत्र्य मिळेल आणि त्यांच्यासाठी 'एनपीएस' (NPS) योजना पूर्वीपेक्षा जास्त फायदेशीर ठरेल. सरकारने सर्व सरकारी विभागांना आणि मंत्रालयांना आदेश दिले आहेत की, त्यांनी आपल्या अंतर्गत येणाऱ्या सर्व स्वायत्त संस्थांना या नवीन नियमांची तातडीने माहिती द्यावी.