Ladki Bahin Yojana: बहिणी लाडक्या पण अंगणवाडी सेविका नावडत्या; कामाचे पैसे थकले

लाडकी बहीण योजना पुन्हा एकदा चर्चेत आली आहे. लाडकी बहीण योजनेत फेब्रुवारी महिन्याचा हप्ता कधी येणार याकडे सर्वांचेच लक्ष आहे. लाडकी बहीण योजनेअंतर्गत महिलांना दर महिन्याला पैसे मिळत आहेत. परंतु आता अर्ज भरणाऱ्या अंगणवाडी सेविकांनाच त्यांचे कामाचे पैसे मिळत नाही आहेत. अंगणवडी सेविकाच आता त्यांच्या कामाच्या मोबदल्यापासून वंचित आहेत.

लाडकी बहीण योजनेत अंगणवाडी सेविकांनी महिलांचे अर्ज भरले होते. सरकारने प्रत्येक अर्जामागे प्रोत्साहन भत्ता म्हणून ५० रुपये देणार असल्याचे सांगितले होते.मात्र, हे पैसे अजूनही मिळाले नाहीत.

अंगणवाडी सेविकांना ७ महिन्यानंतर फक्त अर्धे पैसे मिळाले आहेत. त्यामुळे हा अर्धा निधी मिळण्यासाठीही सात महिने लागण्याची खंत सेविकांनी व्यक्त केली आहे. त्यामुळे महिलांची निराशा झाली आहे.

लाडकी बहीण योजनेला ७ महिने झाले आहेत. या योजनेत आता अंगणवाडी सेविका पूर्ण निधी कधी मिळणार याची वाट पाहत आहे. गेल्या अनेक दिवसांपासून अंगणवाडी सेविकांनी यासाठी आंदोलन केले होते. गेल्या तीन चार महिन्यांपासून अंगणवाडी सेविका आपल्या कामाच्या पैशांची मागणी करत आहेत. त्यांना त्यांचा कामाचा मोबदला मिळावा, असं सांगत आहे. त्यामुळे आता अंगणवाडी सेविकांना पूर्ण पैसे कधी मिळणार याकडे लक्ष आहे.

लाडकी बहीण योजनेत महिलांच्या अर्जांची पडताळणी

लाडकी बहीण योजनेत महिलांच्या अर्जांची पडताळणी सुरु झाली आहे. महिलांच्या अर्जांची पडताळणी झाल्यानंतरच फेब्रुवारी महिन्याचा हप्ता दिला जाणार आहे. ही पडताळणी पाच टप्प्यांमध्ये होणार आहे. चारचाकी वाहन आहे की नाही हे तपासले जाणार आहे. त्यानंतर आयकर, वयाची पडताळणी केली जाणार आहे. महिला इतर कोणत्या योजनांचा लाभ घेत नाही ना हेदेखील चेक केले जाणार आहे.