Ladki Bahin Yojana: मोठी बातमी, २७ लाख 'लाडकी'ची आजपासून पडताळणी,अंगणवाडी सेविका घरोघरी जाणार!

लाडकी बहीण योजनेचा लाभ घेतलेल्या महिलांसाठी महत्त्वाची बातमी आहे. आता लाडकी बहीण योजनेच्या लाभार्थ्यांची पडताळणी होणार आहे. यासाठी आता घरोघरी अंगणवाडी सेविका जाऊन पडताळणी करणार आहे. यासाठीची प्रक्रिया आजपासून सुरु झाली आहे.

आजपासून पडताळणी सुरु (Ladki Bahin Yojana Verification Start From Today)

लाडकी बहीण योजनेत २६ लाख ३४ हजार महिला अपात्र ठरल्याची माहिती माहिती व तंत्रज्ञान विभागाने दिली आहे. आता या सर्वांच्या याद्यांमधील महिलांची घरोघरी जाऊन पडताळणी केली जाणार आहे. प्रत्येक जिल्ह्यास या याद्या पाठवून अंगणवाडी सेविकांमार्फत पडताळणी सुरु केली जाणार आहे.

लाडकी बहीण योजनेत २ कोटी ५९ लाख महिलांनी अर्ज केले होते. त्यासाठी निधीदेखील वर्ग करण्यात आला. विधानसभा निवडणुकीपूर्वी महिलांच्या खात्यात पैसे जमा करण्यात आले. मात्र, विधानसभा निवडणुकीनंतर लाडक्या बहि‍णींच्या अर्जाची पडताळणी सुरु केली. त्यातूनही अनेक महिला बाद झाल्या. परंतु आता पुन्हा २६ लाख ४४ हजार महिला अपात्र असल्याची माहिती आदिती तटकरेंनी दिली. त्यानंतर आता अंगणवाडी सेविका या महिलांच्या घरी जाऊन पडताळणी करणार आहे.

या महिलांचे लाभ बंद होणार

या योजनेत ज्या महिलांनी निकषांबाहेर जाऊन लाभ घेतले आहेत त्यांची पडताळणी केली जाणार आहे. त्यात जर महिला अपात्र ठरल्या तर त्यांचा लाभ बंद होणार आहे. ज्या पुरुष लाभार्थ्यांनी योजनेचा लाभ घेतला आहे त्यांच्यावरदेखील कारवाई होणार आहे. त्यांच्याकडून पैसे परत घेतले जाणार आहेत. जवळपास २६ लाख ३४ हजार महिलांच्या घरी जाऊन पडताळणी केली जाणार असल्याचे समजत आहे.

मुख्यमंत्री लाडकी बहीण योजनेत २१ ते ६५ वयोगटातील महिलांनी लाभ घ्यावा. तरीदेखील २१ पेक्षा जास्त वयोगटातील महिलांनी लाभ घेतला आहे. सोलापूरातील २६ हजार ७८ महिलांनी वयोमर्यादेत नसतानाही लाभ घेतला. तसेच एकाच कुटुंबातील दोनपेक्षा जास्त महिलांनी लाभ घेतलेल्यांची संख्या ८३ हजार ७२२ आहे.या महिलांची अंगणवाडी सेविकांमार्फत पडताळणी केली जाईल, असं रमेश काटकर, जिल्हा महिला व बालविकास अधिकारी, सोलापूर यांनी सांगितलं.