Pune Viral Video: पुणे शहरात वाहतूक कोंडी ही नित्याचीच बाब असते, अशाच परिस्थितीत एखादी मोठी दुर्घटना होणे टळल्याची घटना समोर आली आहे. पुणे महानगर परिवहन महामंडळ बसचे भर रस्त्यात अचानक ब्रेक फेल झाले आणि काही क्षणातच संपूर्ण रस्त्यावरील परिस्थिती चिघळू शकली असती. मात्र, या संकटकाळात बसचा चालक आणि वाहक यांनी जे प्रसंगावधान दाखवले, त्याचे सोशल मीडियावर सर्वत्र कौतुक होत आहे. या घटनेचा थरारक व्हिडीओ सध्या व्हायरल झाला आहे.

घटनेचा थरारक क्षण

ही घटना नेमकी पुणे शहरातील नेमकी कुठल्या परिसरातील आहे ते अद्याप समजू शकलेले नाही. मात्र, हा प्रसंग सकाळी घडल्याने सर्व परिसर गजबजलेला होता. या गर्दीतूनच एक बस (Bus) जात असताना त्याचा ब्रेक फेल झाला. बस पुढे जात राहिली आणि तिला थांबवण्याचा प्रयत्न बस चालकाने आणि कंटक्टरने केला.

बसमध्ये अनेक प्रवासी असल्याने क्षणभर सगळ्यांची धडधड वाढली होती. काही जणांनी तर घाबरून बसमध्येच किंचाळायला सुरुवात केली. पण अशा तणावपूर्ण क्षणी बसचालकाने आपले भान न गमावता बसला एका बाजूला वळवून थांबवण्याचा प्रयत्न सुरू ठेवला. कंडक्टरही प्रवाशांना धीर देत दरवाजाकडे जाऊ नका, खाली उतरू नका असं सांगत होता.

ड्रायव्हरने दाखवली चपळाई

ड्रायव्हरने(Driver) ज्या प्रकारे प्रसंगावधान राखत रस्त्याच्या कडेला असलेल्या एका मोकळ्या भागाकडे बस वळवली, त्याने मोठी दुर्घटना टळली. समोरून येणारी वाहने, बाजूने चालणारे पादचारी, दुचाकीस्वार यांना कोणतीही इजा न होता, बस त्या मोकळ्या जागेत थांबवण्यात आली. सुदैवाने या घटनेत कोणतीही जीवितहानी झाली नाही.

टीप: हा व्हिडीओ सोशल मीडियावर व्हायरल होत आहे. याची पडताळणी झालेली नाही. फक्त माहिती म्हणून आम्ही वाचक-प्रेक्षकांपर्यंत ही बाब पोहचवत आहोत. याचं आम्ही कोणत्याही प्रकारे समर्थन करत नाही.