मुंबईची लाईफलाईन असलेल्या रेल्वेने नवीन वर्षाचे म्हणजेच 2026 चे अनोख्या पद्धतीने स्वागत केले. नववर्षाच्या मध्यरात्री बरोबर 12 वाजता छत्रपती शिवाजी महाराज टर्मिनस (CSMT) स्थानकावर लोकल ट्रेनच्या एकत्रित हॉर्नच्या आवाजाने संपूर्ण परिसर दुमदुमून गेला. याचा व्हिडीओ सोशल मिडीयावर प्रंचड व्हायरल होत आहे. या स्थानकावर नवीन वर्ष नेमकं कशा पद्धतीने साजरं केलं जाणून घेऊयात.

तर... रात्री आणि 2026 सुरु होण्याच्या 1 मिनिटा आधी संपूर्ण प्रवासी ट्रेनच्या बाहेर मोबाइलची टॉर्च लावून उभे राहीले. शेवटचा १ मिनिट असताना सगळ्यांनी एका सुरात काउंटडाऊन करायला सुरुवात केली. काही क्षणांतच घड्याळाने 12.00 चा आकडा दाखवला आणि एकाच वेळी सगळ्या रेल्वेच्या हॉर्नचा नाद ऐकू आला. अशा पद्धतीने स्थानकावर 2026 चे जल्लोषात स्वागत करण्यात आले.

रोज धकाधकीचा प्रवास करणारे प्रवासी या दिवशी एकत्र येऊन हा आनंद मोठ्या जल्लोषात साजरा करत होते. व्हिडीओत हॉर्नच्या आवाजावर काहीजण नाचताना सुद्धा पाहायला मिळाले. या क्षणांचे व्हिडीओ सोशल मीडियावर व्हायरल झाला असून ट्विटर आणि इतर प्लॅटफॉर्मवर मोठ्या प्रमाणात शेअर केला गेला.

व्हिडीओमध्ये प्रवासी टाळ्या वाजवत, आनंदाने ओरडत आणि मोबाईलमध्ये हा अविस्मरणीय क्षण टिपताना दिसले. ऐतिहासिक वारसा लाभलेल्या CSMT स्थानकावर प्रवासी आणि लोकल ट्रेन यांच्यातील हा अनोखा संवाद पाहून अनेकांनी ही परंपरा कौतुकास्पद असल्याच्या प्रतिक्रिया दिल्या आहेत. मध्य रेल्वेकडून गेल्या अनेक वर्षांपासून ही नववर्ष स्वागताची विशेष परंपरा जपली जात आहे. शहराच्या धावपळीच्या जीवनात क्षणभर थांबून आनंद साजरा करण्याची संधी देणारा हा उपक्रम प्रवाशांमध्ये उत्साह निर्माण करतो. लोकल ट्रेनचा एकत्रित हॉर्न हा मुंबईकरांसाठी फक्त आवाज नसून नव्या वर्षाच्या आशा, उत्साह आणि एकजुटीचे प्रतीक ठरला. 2026 च्या स्वागतासाठी लोकलने पुन्हा एकदा मुंबईकरांच्या मनात खास जागा निर्माण केली आहे.