धाराशिव तालुक्यातील पिंपरी येथील जिल्हा परिषद शाळेत विद्यार्थ्यांना देण्यात येणाऱ्या पौष्टिक चॉकलेटमध्ये (मिलेट न्यूट्रेटिव्ह बार) पुन्हा एकदा अळ्या आढळून आल्या आहेत. प्रधानमंत्री पोषण शक्ती निर्माण योजनेअंतर्गत विद्यार्थ्यांना वितरित करण्यात येणाऱ्या या चॉकलेटमध्ये अळ्या असल्याचे वितरित करण्यापूर्वीच लक्षात आले. या प्रकारामुळे विद्यार्थ्यांच्या आरोग्याशी गंभीर स्वरूपात खेळ केला जात असल्याची चिंता पालक आणि शिक्षक वर्गातून व्यक्त केली जात आहे. यापूर्वीही धाराशिव जिल्ह्यातील कळंब तालुक्यातील पाथर्डी येथील शाळेत अशाच प्रकारची तक्रार पालकांनी केली होती. विद्यार्थ्यांना वितरित करण्यात आलेल्या चॉकलेटमध्ये अळ्या आणि किडे आढळल्याची माहिती दिली होती.

सदर चॉकलेट म्हणजेच ‘मिलेट न्यूट्रेटिव्ह बार’ हे ज्वारी, बाजरीपासून तयार केले जात असून महाराष्ट्र शासनाच्या माध्यमातून जिल्हा परिषद शाळांना याचा पुरवठा केला जातो. मात्र या पुरवठ्याची गुणवत्ता तपासली जात नाही की काय, असा प्रश्न उपस्थित होत आहे.

या प्रकाराची गंभीर दखल घेत दोषींवर कठोर कारवाई व्हावी, अशी मागणी पालक, ग्रामस्थ आणि शिक्षकांनी केली आहे. दरम्यान, शिक्षण विभाग आणि प्रशासनाकडून यासंदर्भात काय भूमिका घेतली जाते, याकडे सर्वांचे लक्ष लागले आहे.