मुंबईत आज पुन्हा एकदा ठाकरे बंधूंची गुप्त भेट झाली आहे. नियोजित नसतानाच मनसे अध्यक्ष राज ठाकरे थेट ‘मातोश्री’वर, म्हणजेच उद्धव ठाकरे यांच्या निवासस्थानी दाखल झाले. विशेष म्हणजे या भेटीबाबत पूर्ण गुप्तता पाळण्यात आली असून, मातोश्रीवर कोणताही अन्य नेता उपस्थित नव्हता.

आज सकाळी संजय राऊत यांच्या कौटुंबिक कार्यक्रमात उद्धव ठाकरे आणि राज ठाकरे दोघेही एकत्र दिसले. त्याच कार्यक्रमात ठाकरे गटाचे नेते अनिल देसाई, मिलिंद नार्वेकर, सचिन आहिर उपस्थित होते. मात्र, राज ठाकरे मातोश्रीवर जाणार आहेत याची कुणालाच कल्पना नव्हती. हे प्रथमच झाले असे नाही.

याआधीही दोन्ही भावांनी अनेकदा गुप्तपणे भेट घेतली आहे. उद्धव ठाकरे यांच्या वाढदिवशी राज ठाकरे थेट मातोश्रीवर दाखल झाले होते. गणेशोत्सवानंतर उद्धव ठाकरे देखील राज ठाकरेंच्या निवासस्थानी ‘शिवतीर्थावर’ पोहोचले होते. या नव्या भेटीमुळे राजकीय वर्तुळात चर्चेचा भडका उडाला आहे. दोन्ही भावांमध्ये नक्की काय चर्चा झाली, भविष्यातील राजकारणात काही नवीन समीकरण तयार होणार का, या प्रश्नांवर आता सगळ्यांचे लक्ष लागले आहे.