पुण्यातील पोर्शे कार अपघात प्रकरणातील आरोपी विशाल अग्रवाल जामिनावर बाहेर येताच जंगी पार्टी करण्यात आली. या पार्टीतील व्हिडिओ समोर आला आहे. हा व्हिडीओ सध्या सोशल मीडियावर व्हायरल होत आहे. या व्हिडिओत अग्रवाल पती-पत्नी गळ्यात नोटांचे हार घालून 'मुंबई से आया मेरा दोस्त' या गाण्यावर डान्स करताना दिसत आहेत. महिन्याभरापूर्वीच विशाल अग्रवालची सुटका झाली. जेलवारीनंतरही अग्रवाल कुटुंबाचा हा माज कायम असल्याचं दिसत आहे.

पुण्यातील कल्याणीनगरमध्ये १९ मे २०२४ रोजी पोर्शे कार अपघाताची घटना घडली होती. १७ वर्षीय तरुणाने दारूच्या नशेत भरधाव कार चालवत दोन जणांना चिरडले होते. या अपघातामध्ये इंजिनिअर तरुण अनीश अवधिया आणि तरुणी अश्निनी कोष्टा या दोघांचा मृत्यू झाला होता. या अपघाताप्रकरणी अग्रवाल कुटुंबीयांविरोधात कारवाई करण्यात आली होती. संपूर्ण कुटुंब जेलमध्ये गेले होते. २२ महिन्यांनंतर या प्रकरणातील आरोपी विशाल अग्रवालला जामीन मिळाला. जामीन मिळाल्यानंतर त्याने जंगी पार्टी केली या पार्टीतील व्हिडीओ समोर आल्याने अग्रवाल कुटुंबीय पुन्हा चर्चेत आले आहेत.