हार्बर मार्गावर शुक्रवारी रात्री एक मोठी दुर्घटना टळली आहे . छत्रपती शिवाजी महाराज टर्मिनस (CSMT) वरून पनवेलकडे निघालेल्या लोकलच्या मोटरमनला अचानक अस्वस्थ वाटू लागले. मात्र प्रसंगावधान राखून त्यांनी बेलापूर स्थानकात लोकल थांबवली आणि प्रवाशांच्या सुरक्षिततेला प्राधान्य दिले. त्यांच्या या दक्षतेमुळे शेकडो प्रवाशांचा जीव वाचला आणि मोठा अपघात टळला आहे.

ही घटना रात्री अंदाजे 11 वाजताच्या सुमारास घडली. मोटरमनला लोकल बेलापूर स्थानकात आल्यावर अचानक अस्वस्थता जाणवायला लागली. त्यांनी तत्काळ गाडी थांबवली आणि परिस्थिती हाताळली. घटनेनंतर हार्बर मार्गावरील रेल्वे सेवा काही काळासाठी विस्कळीत झाली होती. संबंधित लोकल जवळपास वीस ते पंचवीस मिनिटे बेलापूर स्थानकात थांबवण्यात आली होती.

मोटरमनला तातडीने प्राथमिक उपचार देण्यात आले. दरम्यान रेल्वे प्रशासनाने दुसऱ्या मोटरमनची तातडीने व्यवस्था करून प्रवाशांना पुढील प्रवासासाठी सोय उपलब्ध करून दिली. अस्वस्थ झालेल्या मोटरमनला एमजीएम (MGM) रुग्णालयात दाखल करण्यात आले असून सध्या त्यांच्यावर उपचार सुरू आहेत. त्यांची प्रकृती स्थिर असल्याचे रेल्वे प्रशासनाकडून सांगण्यात आले आहे.या घटनेमुळे काही काळ प्रवाशांमध्ये गोंधळाचे वातावरण निर्माण झाले होते. मात्र रेल्वे कर्मचाऱ्यांनी योग्य वेळी हस्तक्षेप करून परिस्थिती नियंत्रणात आणली.