मुंबईतील कबुतरखाने बंद करण्यावरूनचा वाद चांगलाच पेटला आहे. अशामध्ये मनेसे नेते संदीप देशपांडे यांच्या टीशर्टने सर्वांचे लक्ष वेधून घेतले आहे. 'नरेस, सुरेस, परेस, चड्डीत राहायचं!', अशा आशयाचे टीशर्ट त्यांनी घातले आहे. यामाध्यमातून मनसेने अमराठी भाषिकांना इशारा दिला आहे. दादर परिसरात ते हा टीशर्ट घालून फिरत होते. हा टी-शर्ट म्हणजे मुंबईमध्ये राहून मुजोरी करणाऱ्या अमराठी भाषिकांसाठी अप्रत्यक्ष इशारा असल्याचे म्हटले जात आहे.

दरम्यान, मुंबई हायकोर्टाच्या आदेशानंतर मुंबईतील कबुतरखाने मुंबई महानगर पालिकेकडून बंद करण्यात येत आहेत. पण कबुतरखाने बंद करण्यास जैन समाजाकडून विरोध केला जात आहे. दादरमध्ये जैन समाजाच्या नागरिकांनी आंदोलन करत बीएमसीने कबुतरखान्यावर टाकलेली ताडपत्री आणि बांबू हटवण्यात आले होते. या आंदोलनावेळी पोलिस आणि आंदोलकांमध्ये बाचाबाची झाली होती. अशातच आता संदीप देशपांडे यांनी परिधान केलेल्या टीशर्टवर लिहिलेला संदेश या अमराठी भाषिकांसाठी इशारा असल्याचे म्हटले जात आहे. आता या कबुतरखान्याबाबत मनसे काय भूमिका घेतंय याकडे सर्वांचे लक्ष लागले आहे.