Gokul Election Date Update : कोल्हापूर जिल्ह्याच्या राजकारणात प्रतिष्ठेची मानली जाणारी गोकुळ दूध संघ निवडणूक अखेर मार्गी लागली असून निवडणुकीचा बिगुल वाजला आहे. दोन जूनपासून ठराव संकलन प्रक्रियेला सुरुवात होणार असून एक जुलै २०२६ पर्यंत ठराव दाखल करण्याची मुदत देण्यात आली आहे. त्यामुळे जिल्हाभरात राजकीय हालचालींना वेग आला आहे.

गोकुळ दूध संघाच्या निवडणुकीकडे संपूर्ण जिल्ह्याचं लक्ष लागून राहिलं आहे. गेल्या काही महिन्यांपासून न्यायालयीन प्रक्रिया आणि मतदार याद्यांवरील वादामुळे निवडणूक प्रक्रिया रखडली होती. मात्र आता पुन्हा निवडणूक प्रक्रिया सुरू झाली असून दोन जूनपासून संस्थांकडून ठराव संकलनाची प्रक्रिया सुरू होणार आहे. तर एक जुलै २०२६ ही ठराव दाखल करण्याची अंतिम मुदत निश्चित करण्यात आली आहे. विद्यमान संचालक मंडळाची मुदत संपल्यानंतर आता गोकुळच्या सत्तेसाठी राजकीय गटांमध्ये मोर्चेबांधणी सुरू झाली आहे. जिल्ह्यातील दूध संस्थांमध्ये बैठका, संपर्क दौरे आणि रणनीती आखण्यास सुरुवात झाली असून ठरावांच्या रणधुमाळीला सुरुवात होणार आहे. गोकुळच्या निवडणुकीत कोण बाजी मारणार याकडे आता संपूर्ण जिल्ह्याचे लक्ष लागले आहे.