स्वित्झर्लंडमध्ये बर्च ग्लेशियर हिमनदीचा मोठा भाग कोसळला. यामुळे आल्प्स पर्वतरांगेतील बहुतेक भाग आणि इथली घरं बर्फाच्या ढिगाऱ्याखाली गेली आहे. हिमकडा कोसळल्यामुळे अख्खं गाव गायब झालं आहे. हिमनदीतील खडकांमधून पूर आल्याने ब्लॅटन हे गावदेखील पाण्याखाली गेला आहे. आतापर्यंत इथल्या ३०० लोकांना सुरक्षितपणे बाहेर काढण्यात आलं आहे. मात्र अद्यापही काही जण बेपत्ता आहेत. जवळपास याठिकाणचा ९० टक्के भाग उद्ध्वस्त झाल्याचे समोर आलं आहे. हिमकडा कोसळल्यानंतरचे काही व्हिडीओ समोर आले असून ते सध्या सोशल मीडियावर व्हायरल होत आहे.

ही घटना दक्षिण स्वित्झर्लंडमधील व्हॅलाइसच्या कॅन्टोनमध्ये असलेल्या ब्लॅटन नावाच्या गावात घडली. हिमकडा तुटल्यामुळे बर्फ, चिखल आणि दगड खाली पडले. यामुळे भूस्खलन सारखी परिस्थिती निर्माण झाली आणि गाव ढिगाऱ्याखाली गाडले गेले. बर्च ग्लेशियर ज्यावर सुमारे ९० लाख टन कचरा जमा झाला होता. सरकारी अभियंत्याने सांगितले की, हिमनदी दररोज ८ ते ११ फूट घसरत होती आणि अखेर ती कोसळली. ज्यामध्ये एका गावाचे ढिगाऱ्यात रूपांतर झाले. हे गाव पुन्हा बांधण्यासाठी अनेक वर्षे लागू शकतात आणि नुकसान किती झाले आहे याची माहिती अद्याप समोर आली नाही.