डोंबिवलीमध्ये जास्त परतावा आणि बोनस स्कीमचं आमिष दाखवून 100 पेक्षा अधिक गुंतवणूकदारांची 4 ते 5 कोटी रुपयांची फसवणूक करण्यात आली. या प्रकरणात मुख्य आरोपी गौरव भगत, बिपिन पाटणे, देवेंद्र तांबे आणि अमोल तायडे यांना ठाणे आर्थिक गुन्हे अन्वेषण शाखेने (EOW) अटक केली आहे. या आरोपींना आज कल्याण न्यायालयात हजर करण्यात आलं, जिथे न्यायालयानं त्यांना 6 ऑक्टोबरपर्यंत पोलीस कोठडी सुनावली.

आरोपींची चौकशी सुरू असून, इतर फरार आरोपींचा शोधही पोलीस घेत आहेत. तक्रारीनुसार ‘फिनिक्स इन्व्हेस्टमेंट’ आणि ‘फिनिक्स फायनान्शियल सोल्युशन एल.एल.पी.’ या नावाखाली भागीदारी संस्था सुरू करून गुंतवणूकदारांना मोठ्या परताव्याचं आमिष दाखवलं गेलं. सुरुवातीला काहींना थोडाफार नफा दिला गेला, पण नंतर मूळ रक्कमसुद्धा परत केली नाही. या प्रकरणात तब्बल 80 तक्रारी डोंबिवली पोलिसांत नोंदवल्या गेल्या होत्या. मात्र फसवणुकीची रक्कम कोट्यवधींवर गेल्याने तपास आर्थिक गुन्हे अन्वेषण शाखेकडे वर्ग करण्यात आला. या घोटाळ्यातील रक्कम 4 ते 5 कोटींपर्यंत पोहोचली आहे. EOW च्या टीमनं ठोस पुरावे जमा करून कारवाई केली असून, उर्वरित आरोपींच्या शोधासाठी पोलीस पथकं रवाना झाली आहेत.