छत्रपती संभाजीनगर महापालिका निवडणुकीच्या तयारीत हलगर्जीपणा करणाऱ्या कर्मचाऱ्यांवर प्रशासनाने कठोर कारवाईचा बडगा उगारला आहे. निवडणूक प्रशिक्षणास अनुपस्थित राहिलेल्या तब्बल 1200 मतदान केंद्राध्यक्ष व अधिकाऱ्यांना कारणे दाखवा नोटिस बजावण्यात आली आहे.

महापालिका प्रशासनाकडून स्पष्ट करण्यात आले आहे की, निवडणूक प्रक्रिया पारदर्शक व सुरळीत पार पाडण्यासाठी प्रशिक्षण अत्यावश्यक आहे. मात्र अनेक कर्मचाऱ्यांनी प्रशिक्षणाकडे दुर्लक्ष केल्याचे निदर्शनास आले. याची गंभीर दखल घेत मनपा प्रशासक जी. श्रीकांत यांनी संबंधित कर्मचाऱ्यांना कडक इशारा दिला आहे. येत्या 24 तासांत कामावर रुजू न झाल्यास किंवा समाधानकारक कारण न दिल्यास संबंधित कर्मचाऱ्यांविरुद्ध थेट गुन्हे दाखल करण्यात येतील असेही प्रशासकांनी स्पष्ट केले आहे. प्रशासनाच्या या कारवाईमुळे महापालिका वर्तुळात एकच खळबळ उडाली आहे.