नाशिक: माझी नवऱ्याची बायको’ या मालिकेतून घराघरात पोहोचलेला लोकप्रिय मराठी अभिनेता अभिजीत खांडकेकर याच्या नाशिकच्या घरी यंदाही गणरायाचं आगमन झालं आहे. दरवर्षीप्रमाणेच अभिजीत खास गणेशोत्सव साजरा करण्यासाठी नाशिकला हजेरी लावतो आणि आपल्या कुटुंबीयांसमवेत बाप्पाची प्रतिष्ठापना करतो.

यंदा त्याने पर्यावरणपूरक शाडू मातीच्या मूर्तीची प्रतिष्ठापना करून गणपती बाप्पाचं स्वागत केलं. विशेष म्हणजे अभिजीत व पत्नी सुखदा खांडकेकर यांनी यंदा बाप्पाच्या आरासीत कलेचा विशेष स्पर्श दिला असून कलेशी निगडीत सजावट घरच्या घरी साकारली आहे.

गेल्या अनेक वर्षांपासून खांडकेकर कुटुंब नाशिकमध्येच गणरायाचं स्वागत करत असून, त्यांच्या या पारंपरिक आणि साध्या उत्सवाला चाहत्यांकडूनही मोठा प्रतिसाद मिळतो.