Ind vs Aus, World Cup 2023 Final:

वर्ल्डकप २०२३ स्पर्धेचा अंतिम सामना भारत आणि ऑस्ट्रेलिया या दोन्ही संघांमध्ये सुरु आहे. हा सामना अहमदाबादच्या नरेंद्र मोदी स्टेडियमवर सुरु आहे. जगातील सर्वात मोठ्या स्टेडियमवर १.३० लाखांहून अधिक क्रिकेट चाहत्यांनी हजेरी लावली आहे. दरम्यान या सामन्यात रोहितचं अर्धशतक हुकलं असलं तरी त्याच्या नावे एका मोठ्या विक्रमाची नोंद झाली आहे.

रोहितचा मोठा विक्रम..

या सामन्यात ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला. तर यजमान भारतीय संघाला प्रथम फलंदाजी करण्याचं आमंत्रण दिलं. भारतीय संघाकडून रोहित शर्मा आणि शुभमन गिलची जोडी मैदानावर आली.

या सामन्यात रोहितने आक्रमक सुरुवात केली होती. मात्र त्याला मोठी खेळी करता आली नाही. तो ३१ चेंडूंचा सामना करत ४७ धावा करत माघारी परतला. यादरम्यान तो एकाच वर्ल्डकप स्पर्धेत सर्वाधिक धावा करणारा कर्णधार ठरला आहे. (Latest sports updates)

वर्ल्डकप स्पर्धेत सर्वाधिक धावा करणारा कर्णधार..

रोहित शर्माने वनडे वर्ल्डकप स्पर्धेत दमदार खेळ केला आहे. त्याने मोठी खेळी केली नसली तरीदेखील त्याने सुरुवातीच्या षटकांमध्ये विरोधी संघातील गोलंदाजांवर आक्रमण करत भारतीय संघाला दमदार सुरुवात करुन दिली आहे. या सामन्यातही त्याने ताबडतोड ४७ धावा कुटल्या. यासह त्याने वर्ल्डकप २०२३ स्पर्धेत ५९७ धावा कुटल्या आहेत. या बाबतीत त्याने केन विलियम्सन आणि महेला जयवर्धनेला मागे सोडलं आहे.

एकाच वर्ल्डकप स्पर्धेत सर्वाधिक धावा करणारे कर्णधार

रोहित शर्मा (भारत) - ५९७ धावा* (२०२३)

केन विलियम्सन (न्यूझीलंड) - ५७८ धावा (२०१९)

महेला जयवर्धने (श्रीलंका) - ५४८ धावा (२००७)