आयपीएल २०२४ च्या आयपीएलमध्ये सर्व टीमच्या कर्णधाराचं फोटोशूट होतं तेव्हा CSK च्या कर्णधाराला पाहून सर्वांना मोठा धक्का बसला होता. याचं कारण म्हणजे फोटो सेशनसाठी सीएसकेकडून ऋतुराज गायकवाड उपस्थित होता. २०२४ पासून सीएसकेच्या टीमची कमान धोनीला सोडून ऋतुराजकडे सोपवली होती.

ऋतुराजकडे कॅप्टन्सी दिल्यानंतर असं मानलं जात होतं की, फ्रँचायझीने पुढचा विचार करण्यात सुरुवात केलीये. पण गुरुवारी संध्याकाळी यामध्ये एक ट्विस्ट आला. सीएसकेने अचानक घोषणा केली की, ऋतुराज गायकवाड दुखापतीमुळे उर्वरित आयपीएलमधून बाहेर आहे. यासोबतच नवीन कर्णधाराचं नाव म्हणून एमएस धोनीकडे कमान सोपवण्यात आली आहे. एक वर्षापूर्वी, सीएसकेने पुढचा विचार केला होता तर पुन्हा धोनीला कमान का दिली असा प्रश्न आता सर्वांच्या मनात आहे.

अनेक टीम्सने बदलला कर्णधार?

आयपीएल २०२५ च्या सिझनेमध्ये अनेक टीम्सने नवीन कर्णधारांची निवड केली. रॉयल चॅलेंजर्स बंगळुरूमध्ये सिझन सुरू होण्यापूर्वी पुन्हा कोहलीकडे कर्णधारपद सोपवण्यात येणार असल्याची चर्चा होती. मात्र पण आरसीबीने तरुण खेळाडू रजत पाटीदारकडे कर्णधारपद सोपवलं. त्याचप्रमाणे, मुंबई इंडियन्सने गेल्या सिझनमध्ये रोहित शर्माला डावलून हार्दिक पंड्याकडे कर्णधारपद सोपवलं होतं.

चेन्नईकडे तरूण खेळाडू नाही?

चेन्नई सुपर किंग्जने धोनी सोडून दुसऱ्या नेतृत्वाला विकसित होऊ दिलं नाही. सुरेश रैनाला बराच काळ भविष्यातील कर्णधार मानलं जातं होतं. परंतु टीमने त्याला कायम रिटेन केलं नाही. त्याचप्रमाणे फाफ डू प्लेसिसकडे कर्णधारपद सांभाळण्याची क्षमता होती, परंतु सीएसकेनेही त्यामध्ये फारसा रस दाखवला नाही.

२०२२ मध्ये रवींद्र जडेजाला सीएसकेचा कर्णधार बनवण्यात आलं. मात्र तो चांगली छाप पाडू शकला नाही. त्यावेळी सिझनच्या मध्यातच पुन्हा एकदा कर्णधारपद धोनीला सोपवण्यात आलं. मात्र धोनीला पुन्हा कॅप्टन्सी देऊन टीम फारशी चांगली कामगिरी करू शकलेली नाही.

मुख्य म्हणजे टॉस आणि सामन्यानंतरच्या प्रेझेंटेशनमध्ये, मैदानावर कधीही असं वाटलं नाही की धोनी कर्णधारपद भूषवत नाही. ऋतुराज गायकवाड यांच्या बाबतीतही अशीच परिस्थिती दिसून आली. सर्व निर्णयांमध्ये धोनीचा प्रभाव दिसून येत होता. आता ऋतुराजची दुखापत किती गंभीर आहे हे तोच सांगू शकतो. पण कर्णधारपदाच्या मार्गावर पुढे जाण्याऐवजी त्याला मागे हटवल्याने सीएसकेचं भविष्य धोक्यात येण्याची शक्यता आहे.