आयपीएलमध्ये बुधवारी शेवटच्या चेंडूपर्यंत रंगलेल्या सामन्यात अखेर गुजरात टायटन्सने दिल्ली कॅपिटल्सचा एका रनने पराभव केला. या सामन्यात गुजरात टीमचा कर्णधार शुभमन गिलसोबत तीन फलंदाजांनी अर्धशतकं झळकावली. ज्यामुळे टीमला २१० रन्सचा डोंगर उभा करण्यास मदत झाली. मात्र विजयानंतर देखील गिलवर १२ लाखांचा दंड आकारण्यात आला. शुभमनला हा दंड का बसलाय ते पाहूयात.

का ठोठावला गिलवर दंड?

स्लो ओव्हर रेटमुळे शुभमन गिलवर हा दंड ठोठावण्यात आला आहे. ओव्हरचा वेग कमी ठेवल्यामुळे गुजरात टायटन्सचा कर्णधार शुभमन गिलवर दंड आकारण्यात आला आहे. हा त्याच्या टीमचा या सिझनमधील आचारसंहितेच्या अनुच्छेद 2.22 अंतर्गत पहिला गुन्हा होता. त्यामुळे गिल याच्यावर 12 लाख रुपयांचा दंड ठोठावण्यात आला आहे.

जर गुजरात टायटन्सने अशी चूक पुन्हा केली तर कर्णधार गिलला २४ लाख रुपयांचा दंड आकारला जाणार आहे. तर इम्पॅक्ट प्लेअर आणि प्लेइंग ११ मधील खेळाडूंना प्रत्येकी १२ लाख रुपयांचा दंड आकारला जाईल. मात्र, तिसऱ्यांदा चूक केल्यास शुभमन गिलवर थेट एका सामन्याची बंदी घालण्यात येणार आहे.

डेव्हिड मिलरच्या मेहनतीवर पाणी

दिल्ली कॅपिटल्सने १० ओव्हरच्या आतच १०० रन्सचा टप्पा ओलांडला होता. त्यावेळी जवळपास दिल्लीचा विजय निश्चित मानला जात होता. मात्र एकापाठोपाठ एक विकेट पडल्याने दिल्ली मागे पडली. डेव्हिड मिलरने त्याच्या झुंजार खेळीने दिल्लीला विजयाच्या उंबरठ्यावर आणलं पण शेवटच्या बॉलवर त्याला मोठा फटका मारता आला नाही.

दरम्यान गुजरातच्या विजयाचा खरा शिल्पकार ठरला तो राशिद खान. रशीद खानने त्याच्या चार ओव्हर्समध्ये केवळ १७ रन्स देत तीन विकेट्स घेतल्या. त्याने नितीश राणा (५), समीर रिझवी (०) आणि अक्षर पटेल (२) या तीन महत्त्वाच्या विकेट्स घेतल्या. रिझवीने मागील दोन्ही सामन्यांमध्ये अर्धशतके झळकावली होती, पण रशीदने त्याला या सामन्यात मोठा स्कोर करण्याची संधी दिली नाही.