भारतीय संघाच्या स्वागतासाठी जणू संपूर्ण मुंबई मरीन ड्राईव्ह परिसरात दाखल झाली होती. जिकडे नजर जाईल तिकडे भारताचा तिरंगा, फॅन्सची गर्दी आणि मुंबईचा राजा, रोहित शर्माच्या घोषणा. मुंबई कधीच थांबत नाही. असं म्हणतात, पण भारतीय संघाने कित्येक तास मुंबई थांबवून ठेवली. वर्ल्डकप विजयाचा जल्लोष हा मुंबईत पार पडला. या जल्लोषात लाखो मुंबईकरांनी हजेरी लावली होती. दरम्यान या सोहळ्यानंतर कर्णधार रोहित शर्माने आपली प्रतिक्रिया दिली आहे.

नरिमन पॉईंटहून जेव्हा भारतीय संघाला घेऊन जाणारी बस निघाली, त्यावेळी चाहत्यांचा उत्साह पाहण्यासारखा होता. दुपारी भर उन्हात ते संध्याकाळी भर पावसात मुंबईकर थांबून राहिले आणि भारतीय खेळाडूंचं जल्लोषात स्वागत केलं. दरम्यान रोहितने फॅन्सचेही आभार मानले आणि ही ट्रॉफी देशाची आहे, असं म्हटलं.

रोहित शर्माने साम टीव्हीशी बोलताना मराठीत आपल्या भावना व्यक्त केल्या आहेत. तो म्हणाला की, ' खूप आनंद झाला, आम्ही वर्ल्डकप जिंकलो आहे. २००७ आणि २०२४ मध्ये तसा काही फरक नाही. कारण वर्ल्डकप हा वर्ल्डकप असतो. निवृत्तीची घोषणा केली आहे. कारण कुठेतरी थांबायलाच हवं ना. वर्ल्डकप जिंकलो आहे त्याच्यामुळे मी नाचलो आज.'

रोहितला भेटण्यासाठी क्रिकेट फॅन्ससह त्याच्या आई वडिलांनीही हजेरी लावली होती. हा जल्लोष पाहून त्यांचेही डोळे पाणावले. दरम्यान बऱ्याच दिवसांनी रोहितला पाहिल्यानंतर त्यांनाही आपल्या भावना अनावर झाल्या. रोहित समोर येताच त्यांनी रोहितला मिठी मारली.

भारतीय संघ १ जुलै रोजी भारतात दाखल होणार होता. मात्र चक्रीवादळामुळे भारतीय खेळाडू भारतात येऊ शकले नव्हते. त्यानंतर ३ जुलैला एअर इंडियाचं विमान खेळाडूंना घेऊन भारतात येण्यासाठी निघालं आणि ४ जुलैला भारतात दाखल झालं. भारतात आल्यानंतर खेळाडूंनी दिल्लीत पंतप्रधान नरेंद्र मोदींची भेट घेतली. त्यानंतर मुंबईत भारतीय संघाची विजयी परेड काढण्यात आली.