भारत विरूद्ध दक्षिण आफ्रिका यांच्यामध्ये दोन सामन्यांची टेस्ट सिरीज खेळवली जातेय. या सिरीजमधील पहिला सामना ईडन गार्डन्सवर खेळवला जातोय. या सामन्यात बऱ्याच महिन्यांनी ऋषभ पंतचं कमबॅक झालंय. दुखापतीमुळे तो काही दिवस मैदानाबाहेर होता. कमबॅक केल्याच्या या सामन्यात कर्णधार टेम्बा बवुमाच्या विकेटमुळे पंत चांगलाच चर्चेत आहे.

टेम्बा बवुमासाठी पंतने लढवली शक्कल

कुलदीप यादवच्या गोलंदाजीवर ऋषभ पंत फिल्डींग सेट करत होता. यावेळी त्याने लेग साईडला असलेल्या सर्व खेळाडूंना सतर्क राहण्यास सांगितलं. पंतचं सर्व म्हणणं स्टम्प माईकमध्ये कैदही झालंय.

बॉल टाकण्यापूर्वी पंतने कुलदीप आणि फिल्डींगला उभ्या असलेल्या जुरेलला सांगितलं की, बवुमा स्विप शॉट खेळतो त्यामुळे लेगमध्ये त्याचा कॅच मिळू शकतो. त्यानंतर अवघ्या काही वेळातच कुलदीपच्या एका बॉलवर बवुमा स्विप शॉटवर कॅच देऊन बसला. कुलदीपचा बॉल त्याच्या बॅटच्या आतील बाजूस लागला आणि लेग स्लिपवर उभ्या असलेल्या ध्रुव जुरेलने तो योग्य पद्धतीने टिपला. यानंतर सर्वजण पंतकडे पाहू लागले. टेम्बाच्या विकेटसाठी पंतने लढवलेली शक्कल कामी आली.

दोन विकेट बुमराहच्या खात्यात

टीम इंडियासाठी विकेट घेण्याची सुरुवात जसप्रीत बुमराहने केली. बुमराहने रायन रिकल्टनची पहिली विकेट घेतली. आणि त्यानंतर एडेन मार्करमला देखील स्वस्तात माघारी धाडलं. रिकेल्टन 23 रन्स तर मार्करम 31 रन्स करत पव्हेलियनमध्ये पोहोचले. बुमराहने ११ व्या ओव्हरमध्ये रिकेल्टनला बोल्ड केलं तर १३ व्या ओव्हरमध्ये मारक्रमला पंतच्या हातून कॅच आऊट केलं.

टीम इंडियाने पुन्हा गमावला टॉस

दक्षिण आफ्रिकेचा कर्णधार टेम्बा वबुमाने टॉस जिंकून पहिल्यांदा फलंदाजीचा निर्णय घेतला. आफ्रिकेकडून कगिसो रबाडा या सामन्यासाठी उपलब्ध नाहीये. तर त्याच्या जागी कॉर्बिन बॉशला टीममध्ये संधी देण्यात आली आहे. तर टीम इंडियामध्ये ऋषभ पंतचं कमबॅक झालंय. शिवाय अक्षर पटेलही टीममध्ये परतलाय.