दिल्ली : प्रो कबड्डी लीग २०२५ स्पर्धेत पुणेरी पलटन आणि दबंग दिल्ली या दोन्ही संघात रोमहर्षक सामना झाला. अटीतटीच्या सामन्यात दबंग दिल्लीनं ३१- २८ गुणांनी बाजी मारली. हा सामना जिंकून दबंग दिल्लीने प्रो कबड्डी लीग २०२५ स्पर्धतील जेतेपदाचा मान पटकावलाय.

त्यागराज इनडोअर स्टेडियममध्ये हा सामना पार पडला. या सामन्यात दबंग दिल्लीकडून नीरज नरवाल याने सर्वाधिक ९ गुणांची कमाई केली. तर अजिंक्य पवारने ६ गुण कमावले आहेत. या सामन्यात पुणेरी पलटनकडून आदित्य शिंदे याने सुपर १० पूर्ण केलंय. पण शेवटच्या मिनिटाला दबंग दिल्लीने बाजी मारली.

या सामन्यात अस्लम इनामदार पहिली चढाई करण्यासाठी आला होता. त्याने पहिल्याच चढाईत बोनस घेऊन संघाला चांगल सुरुवात करून दिली. या सामन्यात आशू मलिकची पहिल्याच चढाईत पकड झाली होती. पंचांने त्याला सेफ घोषित केलं. यासह दबंग दिल्लीनेही खातं उघडलं.

डू ओर डाय रेडमध्ये पंकज मोहिते याने १ गुण घेतला. सुरुवातीची ५ मिनिटांत दबंग दिल्लीचा संघ ६-४ गुणांसह २ गुणांनी आघाडीवर होता. पूर्वार्धातील सुरुवातीच्या १० मिनिटांचा खेळ झाला. त्यावेळी दबंग दिल्लीचा संघ ८-६ गुणांसह २ गुणांनी आघाडीवर होता.

पूर्वार्धातील पुढील १० मिनिटांमध्ये दोन्ही संघांमध्ये रोमहर्षक सामना रंगला. १३ व्या मिनिटाला पुणेरी पलटन संघाने तिसऱ्यांदा सुपर टॅकल केलं. त्यामुळे संघाच्या गुणसंख्येत आणखी २ गुणांची भर घातली. पुणेरी पलटनचा संघ पहिल्यांदा ऑलआऊट झालाय. दबंग दिल्ली संघाने आणखी ४ गुणांची भर घातली. दिल्ली संघाने १४- ८ गुणांसह ६ गुणांनी आघाडी घेतली.

या सामन्याच्या पूर्वार्धातील २० मिनिटांचा खेळ झाला. त्यावेळी दबंग दिल्लीचा संघ २०-१४ गुणांसह ६ गुणांनी आघाडीवर होता. दिल्लीच्या संघाने आघाडी कायम ठेवली. उत्तरार्धातील १० मिनिटांचा खेळ पूर्ण झाला. त्यानंतर दबंग दिल्लीचा संघ २४-१८ गुणांसह ६ गुणांनी आघाडीवर होता.

शेवटचे ५ मिनिटे शिल्लक राहिले. त्यावेळी दबंग दिल्लीचा संघ २७-२० गुणांसह ७ गुणांनी आघाडीवर होता. शेवटच्या ३ मिनिटांत दबंग दिल्लीचा संघ पहिल्यांदा ऑलआऊट झाला. शेवटचा १ मिनिटांत शिंदेने २ गुण घेत गुणसंख्या २९-२७ वर पोहोचवली. शेवटच्या टप्प्यात दबंग दिल्ली संघाने सामना ३१-२८ गुणांच्या फरकाने जिंकला.