मिशन गोल्ड'साठी भारतीय खेळाडूंनी कंबर कसली आहे. क्रीडाविश्वातील सर्वात मोठी स्पर्धा म्हणजे पॅरिस ऑलिम्पिक २०२४ स्पर्धा सुरू व्हायला अवघे काही दिवस राहिले आहेत. यावेळी पदकांची संख्या वाढविण्यासाठी भारताने आपला सर्वोत्तम खेळाडूंचा चमू पाठवला आहे. या स्पर्धेला येत्या २६ जुलैपासून प्रारंभ होणार आहे. दरम्यान या चमूमध्ये महाराष्ट्रासह, किती राज्यातील किती खेळाडूंनी सहभाग घेतला आहे? जाणून घ्या.

भारताने २०२० मध्ये झालेल्या टोकियो ऑलिम्पिक स्पर्धेत शानदार कामगिरी केली होती. याच स्पर्धेत भारताने विक्रमी ७ पदकांवर नाव कोरलं होतं. तर आतापर्यंतचा रेकॉर्ड पाहिला, तर भारताने आतापर्यंत एकूण ३५ पदकांवर नाव कोरलं आहे. ९ रौप्य, १६ कांस्य आणि १० सुवर्णपदकांचा समावेश आहे.

महाराष्ट्रातील किती खेळाडूंचा समावेश?

पॅरिस ऑलिम्पिक स्पर्धेत महाराष्टातील ५ खेळाडूंचा समावेश आहे. ज्यात उंच उडी इव्हेंटमध्ये सर्वेश कुमार, बॅडमिंटनमध्ये चिराग शेट्टी, स्वप्नील कुसळे ५० मीटर रायफल शूटिंग प्रकारात खेळताना दिसेल. तर महाराष्ट्राचा धावपटू अविनाश साबळेला ३००० मीटर स्टीपलचेस स्पर्धेत पदक मिळवण्यासाठी प्रबळ दावेदार मानलं जात आहे.

इतर राज्यातील किती खेळाडूंचा समावेश?

पॅरिस ऑलिम्पिक स्पर्धेत भारताचं प्रतिनिधित्व करणाऱ्यांमध्ये सर्वाधिक खेळाडू हे हरियाणाचे आहेत. या राज्यातील २४ खेळाडू देशाचा मान वाढविण्यासाठी मैदानात उतरतील. तर पंजाबचे १९ खेळाडू देशाचं प्रतिनिधित्व करताना दिसतील.

यासह उत्तर प्रदेश आणि कर्नाटकातील प्रत्येकी ७ खेळाडू प्रतिनिधित्व करणार आहेत. तर तामिळनाडूतील १३ आणि केरळ राज्यातील ६ खेळाडू देशाचं प्रतिनिधित्व करताना दिसतील. या स्पर्धेला २६ जुलैपासून सुरुवात होणार आहे.