Pakistan vs Sri Lanka World Cup:

पाकिस्तान आणि श्रीलंकेचा आज विश्वचषकातील आठवा सामना राजीव गांधी मैदानावर झाला. श्रीलंकेने पाकिस्तानच्या गोलंदाजांची धुलाई करत ३४४ धावा केल्या. लंकेने दिलेल्या आव्हानाचा डोंगर पाकिस्तानच्या फंलदांजांनी ६ गडी राखून सर केला. पाकिस्तानने वर्ल्डकप इतिहासातील रेकॉर्डब्रेक चेज केला आहे. (Latest Marathi News)

श्रीलंकेने नाणेफेक जिंकून प्रथम फलंदाजी करण्याचा निर्णय घेतला. श्रीलंकेच्या फलंदाजांनी पाकिस्तानी गोलंदाजांच्या भेदका माऱ्याचा आक्रमकपणे सामना केला. लंकेच्या कुसल मेंडिसने पाकिस्तानी गोलंदाजांची चांगली धुलाई केली.

लंकेसाठी मेंडिसने ७७ चेंडूत १४ चौकार आणि ६ षटकारांच्या मदतीने १२२ धावांची वादळी खेळी खेळली. तर समरविक्रमाने ८९ चेंडूत १०८ धावा कुटल्या. समरविक्रमाने एकदिवसीय फॉरमॅटमधील पहिलं शतक ठोकलं. लंकेने ५० षटकात ९ गडी गमावून ३४४ धावा केल्या.

लंकेने दिलेल्या आव्हानाचा पाठलाग करण्यासाठी उतरलेल्या पाकिस्तानची सुरुवात खराब झाली. लंकेने पहिल्या षटकात ६ धावा दिल्या. पाकिस्तानला पहिला धक्का इमाम-उल-हकच्या रुपात बसला.

इमाम १२ धावांत माघारी परतला. त्यानंतर कर्णधार बाबर आझम देखील १५ चेंडूत १० धावा केल्या. त्यानंतर शफीक आणि मोहम्मद रिझवाने कमान सांभाळली. शफीकने ५८ चेंडूत अर्धशतक झळकावले. तर रिझवानने देखील ५८ चेंडूत अर्धशतक केले.

शफीक आणि रिझवानने पुढेही संयमी खेळ दाखवला. शफीकने ९७ चेंडूत शतक पूर्ण केले. त्यानंतर ३४ व्या षटकात शफीक झेलबाद झाला. शफीकने ११३ धावा केल्या. त्यानंतर रिझवान कमान सांभाळत ९७ चेंडूत शतक पूर्ण केले.

महीशच्या गोलंदाजीत शकील बाद झाला. शेवटच्या तीन षटकात २० धावांची गरज असताना रिझवान आणि इफ्तिखारने संयमी खेळ दाखवत संघाला विजय मिळवून दिला. पाकिस्तानने वर्ल्डकपच्या इतिहासातील रेकॉर्डब्रेक चेज केला.