Pakistan Fruad Team : क्रीडा विश्वात सध्या पाकिस्तानला अपमान सहन करावा लागत आहे. आशिया कप २०२५ मध्ये भारतीय खेळाडूंनी पाकिस्तान संघाशी शेकहँड करण्यास नकार दिला. त्यानंतर पाकिस्तानी संघाने आशिया कपमधून बाहेर पडण्याचा निर्णय घेतला. पुढे युटर्न घेत ते यूएई विरुद्ध सामने खेळले. या सर्व प्रकरणामध्ये जगासमोर पाकिस्तानची लाज निघाली आहे. यूएईमध्ये अपमान होत असतानाच पाकिस्तानने जपानमध्ये मोठी फसवणूक केल्याची धक्कादायक माहिती समोर आली आहे.

जपानमध्ये खेळल्या जाणाऱ्या एका फुटबॉल स्पर्धेमध्ये सहाभागी होण्यासाठी पाकिस्तानने एक बनावट फुटबॉल संघ जपानला पाठवला. अधिकाऱ्यांना संघावर, संघातील खेळाडूंवर संशय आला. चौकशीदरम्यान सर्व खेळाडू बनावट असल्याचे आढळून आले. या बनावट पाकिस्तानी संघाला तात्काळ जपानमधून हद्दपार करण्यात आले आहे.

मिळालेल्या माहितीनुसार, पाकिस्तान तपास संस्था एफआयएने या रॅकेटचा पर्दाफाश केला आहे. हे बनावट खेळाडू बेकायदेशीरपणे जपानमध्ये प्रवेश करण्याा प्रयत्न करत होते. पाकिस्तान फुटबॉल संघाचे सदस्य असल्याचे भासवत होते. त्यांनी पाकिस्तान फुटबॉल फेडरेशनशी संबंध असल्याचा दावा केला होता. फुटबॉल खेळाडू असा आव आणणाऱ्यांकडे पाकिस्तानच्या परराष्ट्र मंत्रालयाचे बनावट एनओसी असल्याचे आढळून आले. या प्रकरणामध्ये एकूण २२ संशयितांना अटक करण्यात आली आहे.

जपानमधील इमिग्रेशन अधिकाऱ्यांना फुटबॉल संघातील खेळाडूंवर संशय आला. चौकशी केल्यानंतर फसवणूक होत असल्याचे उघडकीस आले. बनावट कागदपत्रांसह जपानमध्ये आलेल्या सर्वांना पाकिस्तानला जाणाऱ्या विमानात बसवून हद्दपार करण्यात आले आहे. हे लोक पाकिस्तानहून जपानला जाणाऱ्या विमानात कसे चढले याचा तपास सुरु आहे.

या संपूर्ण कटाचा सूत्रधार मलिक वकास असल्याचे म्हटले जात आहे. मलिक हा सियालकोटमधील पसरूरचा रहिवासी होता. वकास गोल्डन फुटबॉल ट्रायल नावाचा बनावट फुटबॉल क्लब चालवत असे. क्लबच्या नावाने प्रवास करण्यासाठी प्रत्येक व्यक्तीकडून अंदाजे ४० ते ४५ लाख रुपये घेतले जात असत. त्याला १५ सप्टेंबर रोजी अटक झाली आहे.