MS Dhoni CSK VS DC : चेन्नई सुपर किंग्स विरुद्ध दिल्ली कॅपिटल्स हा सामना चेपॉक स्टेडियममध्ये खेळला गेला. सामन्यात चेन्नईचा दारुण पराभव झाला. हा सामना जिंकत दिल्ली कॅपिटल्सने सलग तिसरा विजय मिळवला. फलंदाजी करताना चेन्नई सुपर किंग्सचे शिलेदार सपशेल फसले. या पराभवाचे खापर प्रामुख्याने धोनीवर फोडल्याचे पाहायला मिळत आहे. योग्य वेळी धावा न केल्याने महेंद्रसिंह धोनीला सोशल मीडियावर ट्रोल केले जात आहे.

रवींद्र जडेजा बाद झाल्यानंतर दहाव्या ओव्हरमध्ये महेंद्रसिंह धोनी फलंदाजी करण्यासाठी आला. त्याच्यासोबत मैदानामध्ये विजय शंकर होता. ज्या वेळेस धोनी मैदानात उतरला, १० चा रनरेट हवा होता. सामना चेन्नईच्या हातात होता. फटकेबाजी करण्याची वेळ असताना धोनीसह शंकरने देखील संयमी खेळी केली. त्यामुळे रनरेट वाढत गेला.

याशिवाय चेन्नईचे प्रमुख फलंदाज अपयशी ठरल्याने एमएस धोनी आणि विजय शंकर यांच्यावर दबाव आला. तरीही सामना चेन्नईच्या हातात असल्याचे म्हटले जात होते. पण दोघांनीही आक्रमक न खेळल्याने सामना सीएसकेच्या हातून सुटला. त्याच वेळी दिल्लीने देखील चांगला खेळ केला. चेन्नईकडून खेळताना विजय शंकरने सर्वाधिक ६९ धावा केल्या. तर महेंद्रसिंह धोनीने नाबाद ३० धावा केल्या. टूक टूक खेळल्याने चेन्नईचा पराजय झाल्याचे नेटकरी म्हणत आहेत.

प्रथम फलंदाजी करताना दिल्ली कॅपिटल्सने एकूण १८३ धावा केल्या. दुसऱ्या इनिंगमध्ये फलंदाजीसाठी आलेल्या चेन्नई सुपर किंग्सच्या संघाला दिल्लीने १५८ धावांवर रोखले. दिल्लीचा संघदेखील चेन्नईप्रमाणे फलंदाजीत काहीसा अपयशी ठरला होता. पण त्यांनी गोलंदाजीमध्ये कमबॅक केले आणि सामना जिंकला.