MS Dhoni CSK IPL 2025 : चेपॉक स्टेडियमध्ये चेन्नई सुपर किंग्स विरुद्ध दिल्ली कॅपिटल्स हा सामना सुरु झाला आहे. आयपीएल २०२५ मधील हा शनिवारच्या डबल हेडरचा पहिला सामना आहे. दिल्ली कॅपिटल्सचा कर्णधार अक्षर पटेलने टॉस जिंकला आणि पहिल्यांदा फलंदाजी करण्याचा निर्णय घेतला. सामन्यादरम्यान एमएस धोनी आज रिटायरमेंट घेणार अशा सोशल मीडियावर चर्चा रंगल्या आहेत.

चेन्नई विरुद्ध दिल्लीचा सामना पाहण्यासाठी आज एमएस धोनीची पत्नी साक्षी धोनी चेपॉक स्टेडियमला पोहोचली आहे. तिच्यासह माहीचे आई-वडील देखील आले असल्याचे म्हटले जात आहे. त्याच दरम्यान एमएस धोनी आजच्या सामन्यादरम्यान निवृत्त होणार असल्याच्या सोशल मीडियावर चर्चा रंगल्या आहेत.

फलंदाजीसाठी खालच्या क्रमावर आल्याने एमएस धोनीला ट्रोल करण्यात आले होते. त्यानंतर धोनीला १० ओव्हर्स फलंदाजी करणे शक्य नसल्याचे चेन्नई सुपर किंग्सच्या मुख्य प्रशिक्षकांनी माध्यमांसमोर सांगितले होते. धोनीचा खराब फॉर्म सुरु असल्याने तो निवृत्त होणार असल्याच्या चर्चा सुरु झाल्या होत्या. रवींद्र जडेजाने शेअर केलेल्या स्टोरीमुळेदेखील धोनी रिटायरमेंट घेणार का? असे नेटकरी म्हणत होते. याशिवाय ऋतुराज गायकवाडच्या ऐवजी आज धोनी कर्णधारपद सांभाळणार असल्याचेही म्हटले जात होते. त्यामुळे आज पुन्हा धोनीची निवृत्ती हा चर्चेचा विषय बनला आहे.

एमएस धोनीच्या नेतृत्त्वामध्ये चेन्नई सुपर किंग्सने ५ वेळा आयपीएलची ट्रॉफी जिंकली आहे. २००८ पासून २०२३ पर्यंत तो चेन्नईचा कर्णधार होता. २०२४ मध्ये चेन्नई सुपर किंग्सद्वारे कर्णधारपदाची जबाबदारी युवा ऋतुराज गायकवाडकडे सोपवण्यात आली. धोनीने आंतरराष्ट्रीय क्रिकेटमधून निवृत्ती घेतली आहे. तो फक्त आयपीएल खेळतो.