भारत आणि इंग्लंड यांच्यातील टेस्ट सिरीजमधील पाचवा आणि अखेरचा सामना सध्या ओव्हलच्या मैदानावर खेळवला जातो. आज या सामन्याचा चौथा दिवस आहे. या सामन्यात भारतीय टीमने इंग्लंडसमोर विजयासाठी 374 रन्सचं लक्ष्य ठेवलं आहे. तिसऱ्या दिवसाचा खेळ संपेपर्यंत इंग्लंडने एका विकेट मोबदल्यात 50 रन्स केले होते.

या दिवसाच्या शेवटी मोहम्मद सिराजने झॅक क्रॉलीला बोल्ड केलं आणि इंग्लंडला एक मोठा धक्का दिला. विशेष म्हणजे क्रॉलीला बाद करण्यासाठी सिराजने आधीपासून एक खास प्लॅन तयार केला होता आणि त्याच योजनेनुसार त्यांनी त्याला जाळ्यात खेचलं आणि आऊट केलं.

सिराजच्या जाळ्यात फसला झॅक क्रॉली

तिसऱ्या दिवशी शेवटची ओव्हर मोहम्मद सिराजने टाकली. या ओव्हरच्या पहिल्या चार बॉलवर क्रॉलीने चांगली फलंदाजी केली. मात्र, पाचव्या बॉलच्या आधी सिराजने मैदानावर फील्डिंगमध्ये बदल केला. त्याने एक फील्डर डीप स्क्वेअर लेग बाऊंड्रीवर उभा केला. हे पाहून सगळ्यांनाच वाटलं की, सिराज आता एक जबरदस्त बाऊन्सर टाकणार पण त्याने सगळ्यांना चकवून पुढचा बॉल यॉर्कर टाकला आणि झॅक क्रॉलीला बोल्ड केलं.

सिराजच्या या चलाखीने केवळ इंग्लंडला पहिला धक्का दिला नाही तर भारताला देखील एक मोठी विकेट मिळवून दिली. या विकेटनंतर टीम इंडिया आज म्हणजेच चौथ्या दिवशी अधिक आत्मविश्वासाने मैदानात उतरणार आहे.

374 रन्सचं लक्ष्य घेऊन मैदानात उतरलेल्या इंग्लंडला झॅक क्रॉली आणि बेन डकेटनं चांगली सुरुवात करून दिली. या दोघांनी पहिल्या विकेटसाठी 50 रन्सची पार्टनरशिप केली. मात्र, झॅक क्रॉली 36 बॉल्समध्ये 14 रन्स करून बाद झाला. तर दुसरीकडे बेन डकेट 48 चेंडूत 34 धावा करून नाबाद आहे.

आता चौथ्या दिवशी भारतीय गोलंदाजांची जबाबदारी मोठी आहे. इंग्लंडला 324 रन्सची अजून गरज आहे आणि भारताला ही संधी मोठ्या विजयात रूपांतरित करायची आहे. सिराजने दिलेल्या या निर्णायक विकेटमुळे भारताचं पारडं सध्या जड आहे.