Jasprit Bumrah : भारतीय संघाला मोठा धक्का? आशिया कपमधून जसप्रीत बुमराह बाहेर?

Jasprit Bumrah News : भारत विरुद्ध इंग्लंड कसोटी मालिकेतील पाचव्या सामन्यामध्ये जसप्रीत बुमराह सामील झाला नाही. वर्कलोड मॅनेजमेंटमुळे त्याला शेवटच्या कसोटीत न खेळवण्याचा निर्णय भारतीय संघाने घेतला. या मालिकेदरम्यान भारतासाठी चिंताजनक बातमी समोर आली आहे. आशिया कप २०२५ मध्ये जसप्रीत बुमराह खेळणार नसल्याची माहिती समोर आली आहे.

आशिया कप ९ सप्टेंबर रोजी सुरु होणार आहे. त्याच दरम्यान वेस्ट इंडियन संघ कसोटी मालिका खेळण्यासाठी भारतात येणार आहे. बीसीसीआयच्या सूत्राने पीटीआयला दिलेल्या माहितीनुसार, जर बुमराह आशिया कपमध्ये सामील झाला, तर तो वेस्ट इंडिजविरुद्धच्या कसोटी मालिकेत सहभागी होणार नाही. आता बुमराह आशिया कप खेळणार की कसोटी मालिका खेळणार हा प्रश्न उपस्थित केला जात आहे.

जर जसप्रीत बुमराह आशिया कपमध्ये खेळला, तर त्याला एका महिन्याचा ब्रेक दिला जाईल. त्यानंतर तो दक्षिण आफ्रिकेविरुद्ध दोन कसोटी सामने खेळताना दिसू शकेल. पण त्याला वेस्ट इंडिजविरुद्ध कसोटी खेळता येणार नाही. बुमराहविषयीचा हा निर्णय अजित आगरकर आणि गौतम गंभीर यांना घ्यावा लागणार असल्याचे म्हटले जात आहे.

जसप्रीत बुमराहला कसोटी खेळणे आवडते आणि वर्ल्ड टेस्ट चॅम्पयनशिपच्या स्पर्धेतील गुण महत्त्वाचे आहेत. टी-२० क्रिकेटचा विचार केल्यास बुमराह जानेवारी महिन्यात न्यूझीलंडविरुद्ध मालिकेत खेळू शकतो. २०२६ च्या टी-२० वर्ल्डकपच्या तयारीसाठी ही मालिका महत्त्वाची आहे. परिणामी जसप्रीत बुमराह कसोटी खेळणार की आशिया कप खेळणार याकडे सर्वांचे लक्ष लागले आहे.