आयपीएल २०२४ स्पर्धेतील ६७ वा सामना मुंबई इंडियन्स आणि लखनऊ सुपर जायंट्स या दोन्ही संघांमध्ये पार पडणार आहे. हा सामना मुंबईतील वानखेडे स्टेडियमवर रंगणार आहे. संपूर्ण हंगामात सुमार कामगिरी केलेला मुंबई इंडियन्सचा संघ हा सामना जिंकून शेवट गोड करण्याच्या प्रयत्नात असणार आहे. मुंबईचा संघ प्लेऑफच्या शर्यतीतून बाहेर पडणारा पहिला संध ठरला होता. तर लखनऊचे प्लेऑफमध्ये पोहचण्याचे चान्सेस कमी झाले आहेत.

असा राहिलाय दोन्ही संघांचा हेड टू हेड रेकॉर्ड

मुंबई इंडियन्स आणि लखनऊ सुपर जायंट्स या दोन्ही संघांचा हेड टू हेड रेकॉर्ड पाहिला, तर दोन्ही संघ ५ वेळेस आमने सामने आले आहेत. यादरम्यान लखनऊ सुपर जायंट्स संघाने ४ वेळस बाजी मारली आहे. तर मुंबई इंडियन्स संघाला केवळ १ सामना जिंकता आला आहे. हा रेकॉर्ड पाहिला, तर लखनऊचा संघ विजयासाठी प्रबळ दावेदार मानला जात आहे. लखनऊविरुद्ध खेळताना १८२ धावा ही मुंबई इंडियन्स संघाची सर्वोच्च धावसंख्या आहे.तर १९९ धावा ही लखनऊची मुंबई इंडियन्सविरुद्ध केलेली सर्वाच्च धावसंख्या आहे.

कशी असेल खेळपट्टी?

हा सामना मुंबईच्या वानखेडे स्टेडियमवर रंगणार आहे. या स्टेडियमवरील खेळपट्टी ही फलंदाजीसाठी नेहमीच फायदेशीर ठरते. या खेळपट्टीवर बाऊन्स असल्याने चेंडू बॅटवर येतो. त्यामुळे फलंदाजांना मोठे फटके खेळणं सोपं होऊन जातं. तसेच मैदान छोटं असल्याने चौकार आणि षटकारांचा पाऊस पाहायला मिळू शकतो.

कसं असेल हवामान?

मुंबईत सध्या ढगाळ वातावरण आहे. काही दिवसांपूर्वीच मुंबईत जोरदार वादळ आलं होतं. त्यामुळे या सामन्यावरही पावसाचं संकट असणार आहे. accueweather ने व्यक्त केलेल्या अंदाजानुसार, मुंबईतील तापमान २९ डिग्री सेल्सिअसच्या आसपास असेल. तर रात्रीच्या वेळी वादळी वाऱ्यांसह जोरदार पाऊस पडू शकतो. त्यामुळे हा सामना रद्द देखील होऊ शकतो.