आयपीएल 2026 मध्ये चेन्नई सुपर किंग्सला आणखी एक मोठा धक्का बसला आहे. टीमचा महत्त्वाचा वेगवान गोलंदाज खलील अहमद दुखापतीमुळे संपूर्ण आयपीएलमधून बाहेर झाला आहे. नुकतीच टीम विजयाच्या मार्गावर परतली होती. मात्र आता खलील अहमद बाहेर गेल्याने चिंता वाढली आहे

खलील अहमद दुखापतीमुळे बाहेर

डावखुरा वेगवान गोलंदाज खलील अहमद क्वाड्रिसेप्स इंजरीमुळे आयपीएल 2026 मधून बाहेर पडला आहे. कोलकाता नाइट रायडर्सविरुद्धच्या सामन्यात चौथा ओव्हर टाकताना त्याला ही दुखापत झाली. त्यावेळी त्याने उजव्या हिपमध्ये वेदना जाणवल्याची तक्रार केली होती. तो ओव्हर पूर्णही करू शकला नव्हता.

मीडिया रिपोर्टनुसार, खलीलला ग्रेड 2 इंजरी झाली आहे. या दुखापतीतून सावरण्यासाठी त्याला सुमारे 10 ते 12 आठवडे म्हणजे जवळपास 3 महिने रिहॅब करावा लागणार आहे.

IPL 2026 मधील खलीलची कामगिरी

या सिझनमध्ये खलील अहमदने आतापर्यंत 5 सामने खेळले होते. या 5 सामन्यांमध्ये त्याने 73 च्या सरासरीने फक्त 2 विकेट्स घेतल्यात. त्याचा इकॉनॉमी रेट 8.67 इतका आहे. चेन्नई सुपर किंग्सने आयपीएल 2026 च्या लिलावापूर्वी त्याला 4.8 कोटी रुपयांना रिटेन केलं होतं.

CSK च्या गोलंदाजीवर वाढला ताण

खलील अहमदच्या गैरहजेरीमुळे आता CSK च्या वेगवान गोलंदाजीमध्ये बदल होण्याची शक्यता आहे. सध्या गुरजपनीत सिंग, अंशुल कंबोज आणि जेमी ओव्हर्टन यांच्यावर मुख्य जबाबदारी असणार आहे. यापूर्वीच नाथन एलिस देखील दुखापतीमुळे बाहेर गेला आहे. मॅट हेन्रीही सध्या खराब फॉर्ममध्ये आहे. अशा परिस्थितीत मुकेश चौधरी आणि रामकृष्ण घोष यांसारख्या अनकॅप्ड खेळाडूंना संधी मिळू शकते. चेन्नई सुपर किंग्सचा पुढचा सामना 18 एप्रिल रोजी हैदराबादमध्ये सनरायझर्स हैदराबादविरुद्ध होणार आहे.