भारत आणि इंग्लंड या दोन्ही संघांमध्ये आयसीसी टी-२० वर्ल्डकप २०२४ स्पर्धेतील दुसऱ्या सेमिफायनलचा सामना पार पडला. या सामन्यात भारतीय संघाने इंग्लंडला धुळ चारत तिसऱ्यांदा टी-२० वर्ल्डकप स्पर्धेच्या फायनलमध्ये प्रवेश केला आहे. फायनलमध्ये भारतीय संघाचा सामना दक्षिण आफ्रिकेविरुद्ध होणार आहे.

हा सामना स्थानिक वेळेनुसार, सकाळी १० वाजता सुरु होईल. तर भारतीय वेळेनुसार हा सामना रात्री ८ वाजता सुरु होईल. दरम्यान या महत्वाच्या सामन्यापूर्वी क्रिकेट चाहत्यांचं टेन्शन वाढवणारी बातमी समोर येत आहे. २९ जून रोजी बाराबाडोसमध्ये पाऊस पडण्याचा अंदाज वर्तवण्यात आला आहे. दरम्यान हा सामना पावसामुळे रद्द झाल्यास कसा लावला जाईल विजेत्या संघाचा निकाल? जाणून घ्या.

कसं असेल हवामान?

accuweather ने दिलेल्या सामन्यावेळी पाऊस पडण्याची शक्यता ही ७८ टक्के इतकी असणार आहे. हा सामना स्थानिक वेळेनुसार सकाळी १० वाजता सुरु होईल. मात्र टेन्शन वाढवणारी बाब अशी की, रात्री ३ वाजता पाऊस पडण्याची शक्यता ही ५० टक्के इतकी असणार आहे. तर सकाळी ११ वाजता पाऊस पडण्याची शक्यता ही ६० टक्के इतकी असणार आहे. त्यानंतर १२ ते ३ दरम्यानही पाऊस पडण्याचा अंदाज वर्तवण्यात आला आहे. त्यामुळे मैदान कोरडं असेल, तरच हा सामना पूर्ण होईल.

या सामन्यासाठी राखीव दिवस आहे का?

या स्पर्धेतील पहिल्या सेमिफायनलसाठी राखीव दिवस ठेवण्यात आला होता. तर दुसऱ्या सेमिफायनलसाठी राखीव दिवस तर नव्हता, माज्ञ अतिरीक्त तास दिले गेले होते. क्रिकेट चाहत्यांसाठी आनंदाची बाब अशी की, भारत आणि दक्षिण आफ्रिका यांच्यात होणाऱ्या फायनलच्या सामन्यासाठी राखीव दिवस ठेवण्यात आलेला आहे. त्यामुळे हा सामना २९ ला पूर्ण होऊ शकला नाही, तर ३० जून रोजी हा सामना खेळवण्यात येईल.

राखीव दिवशी पाऊस आला तर काय?

राखीव दिवशीही पाऊस पडण्याचा अंदाज वर्तवण्यात आला आहे. त्यामुळे या दिवशी जर पावसाने हजेरी लावली, तर दोन्ही संघांना संयुक्तरित्या विजेता घोषित करण्यात येईल.