भारतीय संघ ऑस्ट्रेलिया दौऱ्यावर आहे. दोन्ही संघामध्ये ५ कसोटी सामन्यांची मालिका सुरू आहे. मालिकेतील दुसरा सामना ६ ते १० डिसेंबर दरम्यान रंगणार आहे. हा डे नाईट कसोटी सामना असणार आहे. दरम्यान या सामन्यापूर्वी भारताचे माजी कर्णधार सुनील गावसकर यांनी मोठी भविष्यवाणी केली आहे.

भारतीय संघ या मालिकेत १-० ने आघाडीवर आहे. या मालिकेत भारताचा कर्णधार रोहित शर्मा कमबॅक करताना दिसून येणार आहे. तो पहिल्या कसोटीत खेळताना दिसून आला नव्हता. तर दुखापतग्रस्त झालेला गिल देखील या सामन्यातून कमबॅक करताना दिसेल.

सुनील गावसकरांच्या मते भारतीय संघात बदल होणार हे निश्चित आहे. रोहित शर्मा आणि शुभमन गिल संघात परतल्यानंतर ध्रुव जुरेल आणि देवदत्त पडीक्कलला बसावं लागेल. यासह फलंदाजी क्रमातही बदल पाहायला मिळू शकतात.

रोहित शर्मा संघात नसताना, यशस्वी जयस्वाल आणि केएल राहुल यांनी डावाची सुरुवात केली होती. सुनील गावसकरांच्या मते केएल राहुल पुढील सामन्यात मधल्या फळीत फलंदाजी करताना दिसून येऊ शकतो.

काय म्हणाले सुनील गावसकर?

सुनील गावसकर म्हणाले, ' माझ्या मते संघात २ बदल नक्कीच होतील. रोहित शर्मा आणि शुभमन गिल प्लेइंग ११ मध्ये येणार आणि ते आल्यानंतर फलंदाजी क्रमात बदल होणार. रोहित केएल राहुलची जागा घेणार.

तसेच गिल पडीक्कलच्या जागी फलंदाजी करेल. पडीक्कल आणि जुरेल प्लेइंग ११ मधून बाहेर होतील. तर राहुलला सहाव्या क्रमांकावर फलंदाजीला उतरावं लागेल.'

यासह त्यांचं म्हणणं आहे की, दुसऱ्या कसोटीत वॉशिंग्टन सुंदरच्या जागी रविंद्र जडेजाचा संघात समावेश केला जाऊ शकतो.