कसोटीच्या पहिल्या दिवसापासून असलेला वेग, जोश अगदी पाचव्या दिवसांपर्यंत तसाच, विकेट घेण्याची भूक तर जबरदस्त! लाल चेंडू हाती असला की तो मैदानावरचा बादशहाच. खोचक माऱ्यानं प्रतिस्पर्धी फलंदाजांची दांडी गूल करण्याची जणू सवयच लागलीय. होय मोहम्मद सिराज. भारताचा तेजतर्रार गोलंदाज. वेस्ट इंडीजविरुद्धच्या दुसऱ्या कसोटी सामन्यात सिराजनं एक जादुई चेंडू फेकला आणि जगातील क्रमांक एकचा गोलंदाज झाला.

ऑस्ट्रेलिया, इंग्लंडसारख्या संघातील गोलंदाजांनाही जमलं नाही, ते भारताचा युवा गोलंदाज मोहम्मद सिराज यानं करून दाखवलंय. वेस्ट इंडीजविरुद्धच्या पहिल्या कसोटीत फलंदाजीचं कंबरडं मोडून काढणारा सिराज दुसऱ्या कसोटीतही विंडीजच्या फलंदाजांवर तुटून पडला. वेस्ट इंडीजचा शतकवीर शे होप याचा सिराजनं त्रिफळा उडवला आणि जगातील नंबर गोलंदाज होण्याचा मान त्यानं मिळवला. २०२५ या वर्षात कसोटीत सर्वाधिक विकेट घेणारा गोलंदाज ठरला आहे.

सिराज आघाडीवर

मोहम्मद सिराजनं शतकवीर शे होपला बाद केलं. होपचा त्रिफळा उडवताच सिराज २०२५ मध्ये सर्वाधिक कसोटी विकेट घेणारा गोलंदाज ठरला आहे. झिम्बाब्वेचा वेगवान गोलंदाज ब्लेसिंग मुजरबानी याला त्यानं मागे टाकलं आहे. सिराजनं इंग्लंड दौऱ्यातही कमालीची गोलंदाजी केली होती. आता वेस्ट इंडीजविरुद्ध अहमदाबाद आणि नंतर दिल्लीत आपली दंबगगिरी दाखवून दिली आहे.

५१ वर्षांचा दुष्काळ संपला

वेस्ट इंडीजकडून दुसऱ्या डावात २ फलंदाजांनी शतके झळकावली. याआधी जॉन कॅम्पबेल यानं ११५ धावा केल्या. त्यानंतर शे होप यानं शतकी खेळी केली. ५१ वर्षांनंतर वेस्ट इंडीजच्या दोन फलंदाजांनी एकाच डावात भारतात शतक झळकावलं आहे. पण शतक झळकावल्यानंतर या दोघांनाही मोठी खेळी करता आली नाही. ते लगेच बाद झाले. कॅम्पबेलला जडेजानं तंबूत पाठवलं. तर शे होप १०३ धावांवर सिराजच्या चेंडूवर बाद झाला. हे दोघे बाद झाल्यानंतर कुलदीप यादवने वेस्ट इंडीजची मधली फळी उद्ध्वस्त करून टाकली. कर्णधार रॉस्टन चेज, टेविन इमलाक आणि खारे पियर यांना त्यानं बाद केलं.