आयसीसी चॅम्पियन्स ट्रॉफी २०२५ स्पर्धेतील साखळी फेरीतील शेवटचा सामना भारत आणि न्यूझीलंड या दोन्ही संघांमध्ये सुरु आहे. हा सामना भारतीय संघातील अनुभवी फलंदाज विराट कोहलीसाठी अतिशय स्पेशल होता.

विराट आपल्या वनडे आंतरराष्ट्रीय कारकिर्दीतील ३०० वा सामना खेळण्यासाठी मैदानात उतरला. मात्र या सामन्यात विराटला मोठी खेळी करता आली नाही. तो अवघ्या ११ धावा करत तंबूत परतला. विराटने क्लासिक शॉट मारला होता. मात्र जगातील सर्वोत्तम क्षेत्ररक्षक म्हणून ओळखल्या जाणाऱ्या ग्लेन फिलिप्सने अविश्वसनिय झेल घेतला आणि विराटला तंबूत धाडलं.

न्यूझीलंडने नाणेफक जिंकून भारतीय संघाला प्रथम फलंदाजी करण्याचं आमंत्रण दिलं. भारतीय संघाकडून रोहित शर्मा आणि शुभमन गिल ही जोडी डावाची सुरुवात करण्यासाठी मैदानात आली होती. मात्र या जोडीला हवी तशी सुरुवात करता आली नव्हती. विराट ११ धावांवर फलंदाजी करत असताना भारतीय संघाला तिसरा धक्का बसला.

तर झाले असे की, भारतीय संघाची फलंदाजी सुरु असताना, न्यूझीलंडकडून ७ वे षटक टाकण्यासाठी मॅट हेनरी गोलंदाजीला आला होता. या षटकातील चौथ्या चेंडूवर विराट कोहलीने ऑफ साईडच्या दिशेने शॉट मारण्याचा प्रयत्न केला.

मात्र चेंडूत हवेत गेला त्यावेळी ग्लेन फिलिप्स पॉईंटच्या दिशेने क्षेत्ररक्षण करत होता. हा चेंडू वेगाने आला आणि ग्लेन फिलिप्सला अवघ्या ०.६२ सेकंदांचा वेळ मिळाला. फिलिप्सने इतका कमी वेळ असतानाही डाईव्ह मारत शानदार झेल घेतला. हा झेल पाहून विराटलाही मोठा धक्का बसला. इतकंच काय तर स्टँड्समध्ये सामना पाहण्यासाठी आलेल्या अनुष्का शर्मानेही डोक्याला हात लावला. हा व्हिडिओ सध्या सोशल मीडियावर तुफान व्हायरल होतोय.

या सामन्यासाठी अशी आहे भारतीय संघाची प्लेइंग ११:

रोहित शर्मा (कर्णधार), शुभमन गिल, विराट कोहली, श्रेयस अय्यर, केएल राहुल, अक्षर पटेल, हार्दिक पंड्या, रवींद्र जडेजा, मोहम्मद शमी, वरूण चक्रवर्ती, कुलदीप यादव.

न्यूझीलंडची प्लेईंग ११

विल यंग, ​​रचिन रवींद्र, केन विल्यमसन, डॅरिल मिशेल, टॉम लॅथम, ग्लेन फिलिप्स, मायकेल ब्रेसवेल, मिचेल सँटनर (कर्णधार), मॅट हेन्री, काइल जेमिसन, विल्यम ओरोरके.