Jasprit Bumrah News In Marathi: कानपूरच्या मैदानावर भारत आणि बांगलादेश यांच्यातील २ कसोटी सामन्यांच्या मालिकेतील दुसरा कसोटी सामना सुरु आहे. या सामन्यातील सुरुवातीचे ३ दिवस पावसामुळे धुतले गेले. अखेर चौथ्या दिवशी पावसाने विश्रांती घेतली. त्यामुळे सामन्याला पुन्हा एकदा सुरुवात झाली आहे. दरम्यान चौथ्या दिवसाच्या सुरुवातीलाच भारतीय संघाने बांगलादेशला मोठा धक्का दिला आहे.

भारतीय संघाने कानपूर कसोटीतील चौथ्या दिवशी शानदार सुरुवात केली आहे. भारताचा अनुभवी गोलंदाज जसप्रीत बुमराहने आपल्या अनुभवाचा फायदा घेत मुशफिकुर रहीमची दांडी गुल केली आहे. ज्याचा व्हिडिओ सध्या सोशल मीडियावर व्हायरल होतोय.

तर झाले असे की, बांगलादेशने पहिल्या दिवशी फलंदाजी करताना ३५ षटकअखेर १०७ धावा केल्या होत्या. त्यावेळी मुशफिकुर रहीम आणि मोमिनुल हक नाबाद परतले होते. दोघेही चौथ्या दिवशी फलंदाजीला आले.

त्यावेळी सुरुवातीच्या काही मिनिटातच बांगलादेशला मोठा धक्का बसला. भारतीय संघाकडून ४१ वे षटक टाकण्यासाठी जसप्रीत बुमराह गोलंदाजीला आला होता. या षटकातील दुसराच चेंडू टप्पा पडला आणि आत आला. हा चेंडू मुशफिकुर रहीमने सोडला. मात्र हा चेंडू यष्टीला जाऊन धडकला. मुशफिकुर रहीमला ११ धावांवर माघारी परतावं लागलं आहे.

या सामन्याबद्दल बोलायचं झालं, तर भारतीय संघाने नाणेफेक जिंकून प्रथम गोलंदाजी करण्याचा निर्णय घेतला. भारतीय संघाकडून गोलंदाजी करताना आकाश दीपने सुरुवातीलाच २ धक्के दिले. जाकीर हसन शून्यावर बाद झाला. तर शदनम इस्लाम २४ धावांवर माघारी परतला. त्यानंतर कर्णधार शांतोने ३१ आणि मुशफिकुर रहीमने ११ धावांची खेळी केली.