भारत आणि ऑस्ट्रेलिया यांच्यात सुरु असलेल्या गाबा कसोटीतील चौथ्या दिवशी आकाशदीप ११ व्या क्रमांकावर फलंदाजी करण्यासाठी आला होता. आकाशदीप फलंदाजी करण्यासाठी आला तेव्हा भारतीय संघावर फॉलोऑनचं संकट होतं.

ऑस्ट्रेलियाने पहिल्या डावात ४४५ धावा केल्या होत्या. भारताला फॉलोऑन टाळण्यासाठी २४६ धावा करायच्या होत्या. इथून जसप्रीत बुमराह आणि आाकाश दीपने ३९ धावांची भागीदारी केली आणि संघावर असलेलं फॉलोऑनचं संकट टाळलं.

आकाशदीपचा गगनचुंबी षटकार

आकाशदीप आपल्या वेगवान गोलंदाजीसह मोठे फटके खेळण्यासाठीही ओळखला जातो. मात्र या डावात फलंदाजी करताना त्याचा डिफेन्स पाहायला मिळाला. त्याने बुमराहसोबत भागीदारी करताना वेगाने येणारे चेंडू खेळून काढले.

शेवटी १ विकेट शिल्लक असताना भारतीय संघाला कुठल्याही परिस्थितीत २४६ च्या पार जायचं होतं. २४६ धावांपर्यंत दोघांनीही सावध राहून फलंदाजी केली. मात्र हा पल्ला गाठताच आकाशदीपने पॅट कमिन्सच्या गोलंदाजीवर षटकार मारुन सलामी दिली. दरम्यान हा षटकार मारताच विराटने दिलेली रिॲक्शन व्हायरल होत आहे.

विराटने दिलेली रिॲक्शन होतेय व्हायरल

तर झाले असे की, फॉलोऑन टळताच आकाशदीपने जोरात बॅट फिरवली. पॅट कमिन्सने जितक्या वेगाने बॉल टाकला, तितक्याच वेगाने हा बॉल स्टेडियमच्या बाहेर गेला. बॉल जेव्हा हवेत होता, त्यावेळी ड्रेसिंग रुममध्ये असलेला विराटही इतका लांब षटकार पाहून शॉक झाला.

मुख्य बाब म्हणजे, हा षटकार त्याने त्याच बॅटने मारला, जी बॅट त्याला विराटने भेट म्हणून दिली होती. कानपूर कसोटीच्या वेळी विराटने त्याला स्वत: वापरलेली बॅट भेट म्हणून दिली होती.

जडेजा- राहुलची झुंजार खेळी

या डावात भारतीय संघाचा डाव गडगडला होता. मात्र केएल राहुलने एक बाजू धरुन ठेवली होती. त्याने या डावात फलंदाजी करताना, १३९ चेंडूंचा सामना करत ८४ धावांची खेळी केली. तर रविंद्र जडेजाने १२३ चेंडूंचा सामना करत ७७ धावांची खेळी केली. या दोघांनी मिळून भारतीय संघाला मजबूत स्थितीत पोहोचवलं आणि शेवटी आकाशदीप- बुमराहच्या जोडीमुळे फॉलोऑन टळला.