आयसीसी टी -२० वर्ल्डकप झाल्यानंतर कर्णधार रोहित शर्माने निवृत्त होण्याचा निर्णय घेतला. त्याच्या या निर्णयानंतर कर्णधारपदाची खुर्ची रिकामी झाली. नुकतेच भारतीय संघाचा झिम्बाब्वे दौरा पार पडला. या दौऱ्यावर युवा खेळाडूंना भारतीय संघात स्थान दिलं गेलं होतं. दरम्यान संघाची जबाबदारी शुभमन गिलच्या हाती सोपवण्यात आली होती. या मालिकेत भारतीय संघाने ४-१ ने बाजी मारली.

आयपीएलमध्ये दमदार कामगिरी करणाऱ्या खेळाडूंना या मालिकेसाठी भारतीय संघात स्थान दिलं गेलं. दरम्यान फलंदाजीत फ्लॉप ठरत असलेल्या गिलकडे स्वतःला सिद्ध करण्याची संधी होती. या संधीचा त्याने दोन्ही हातांनी स्वीकार केला. फलंदाजीसह नेतृत्वातही त्याची कमाल कामगिरी पाहायला मिळाली. पहिल्याच सामन्यात पराभव झाल्यानंतर, भारतीय संघाने पुढील चारही सामन्यांमध्ये विजय मिळवला आणि मालिका ४-१ ने आपल्या नावावर केली.

भारतीय संघाचा ४-१ ने विजय

भारतीय संघाने झिम्बाब्वेविरुद्ध झालेल्या सामन्यात ४-१ ने विजय मिळवला आहे. या मालिकेतील पाचही सामन्यांमध्ये गिल सलामीला फलंदाजी करण्यासाठी आला. यादरम्यान त्याने १७० धावा केल्या. यासह त्याने विराट कोहली आणि रोहित शर्माच्या खास रेकॉर्डच्या यादीत स्थान मिळवलं आहे.

हार्दिक पंड्याचं टेन्शन वाढलं?

शुभमन गिल हा टी -२० मालिकेत कर्णधार म्हणून सर्वाधिक धावा करणारा चौथा खेळाडू ठरला आहे. भारताचा माजी कर्णधार विराट कोहली २३१ धावांसह या यादीत अव्वल स्थानी आहे. यापूर्वी कर्णधारपदासाठी हार्दिक पंड्याला प्रबळ दावेदार मानलं जात होतं. रोहित कर्णधार असताना हार्दिक पंड्या उपकर्णधार होता. मात्र आता गिल देखील कर्णधारपदाच्या शर्यतीत आहे. यासह रिषभ पंतला देखील कर्णधारपदासाठी प्रबळ दावेदार मानलं जात आहे. यापूर्वी सूर्यकुमार यादवला देखील भारतीय संघाचं नेतृत्व करण्याची संधी मिळाली होती. त्यामुळे रोहितनंतर टी-२० संघाचा पूर्णवेळ कर्णधार कोण होणार? हे पाहणं महत्वाचं ठरणार आहे.